انجمن اوقاف جامع مسجد سری نگر کا میر واعظ عمر فاروق کی فوری رہائی کا مطالبہ

سری نگر(پی پی آ ئی)بھارت کے زیر قبضہ جموں وکشمیر میں انجمن اوقاف جامع مسجد سرینگر نے ایک بار پھر میر واعظ عمر فاروق کی فوری رہائی کا مطالبہ کیا ہے۔ کشمیر میڈیا کے مطابق انجمن اوقاف نے سرینگر میں جاری ایک بیان میں کہا کہ میر واعظ کی مسلسل غیر قانونی اور غیر اخلاقی نظر بندی کے سبب کشمیر کی سب سے بڑی عبادتگاہ اور دعوت و تبلیغ کا عظیم مرکز جامع مسجد سرینگر کے منبر و محراب مسلسل خاموش ہیں جس کی وجہ سے کشمیری سماج اور معاشرے پر منفی اثرات مرتب ہو رہے ہیں اور اصلاح معاشرہ کی ہمہ جہت مہم بری طرح متاثر ہو رہی ہے۔انجمن اوقاف نے کہاکہ میر واعظ کی گزشتہ تین برس سے زائد عرصے سے نظر بندی عوام کیلئے انتہائی دکھ اور تکلیف کا باعث ہے لہذا انتظامیہ انکی فوری رہائی عمل میں لائے تاکہ وہ اپنے دینی فرائض انجام دے سکیں۔