اسلام آباد (پی پی آئی)پاکستان تحریک انصاف کے استعفوں کے معاملے پر درخواست سپریم کورٹ میں سماعت کیلئے مقرر کر دی گئی۔پی پی آئی کے مطابق چیف جسٹس عمر عطا بندیال کی سربراہی میں 2رکنی بنچ 21اگست کو سماعت کرے گا،وکیل شاہد اورکزئی نے استعفوں سے متعلق درخواست دائر کی تھی۔
کراچی (پی پی آئی)شہرقائدکے بیشتر علاقوں میں کئی ہفتوں سے سرشام ہی اچانک گیس کی سپلائی معطل ہو جاتے ہے جس سے ایک طرف، تجارتی اورصنعتی سرگرمیاں متاثر ہورہی ہیں تو دوسری سمت خواتین خانہ کو کھانا پکانے میں شدید دشواری کا سامنا ہے۔پی پی آئی کے مطابق گیس بندہونے کی شکایات پر کوئی سبب بھی نہیں بتایا جاتا۔
باکو /کراچی (پی پی آئی)آذربائیجان کی قومی فضائی کمپنی20ستمبر سے پاکستان کیلئے باقاعدگی سے پروازیں شروع کریگی۔ یہ پروازیں اسلام آباد، لاہور اور کراچی کیلئے چلائی جائیں گی۔ پی پی آئی کے مطابق باکو سے اسلام آباد کیلئے پروازیں بدھ اور ہفتہ، لاہور کیلئے پیر اور جمعتہ المبارک اور کراچی کیلئے جمعرات اور اتوار کے روز روانہ ہوا کریں گی۔ترجمان نے بتایا کہ ان پروازوں سے سیاحت اور آمدورفت کو فروغ ملے گا اور پاکستان اور آذربائیجان کے درمیان سفارتی تعلقات مضبوط ہوں گے۔
کراچی (پی پی آئی)ملک میں بڑھتی دہشتگردی کے پیش نظرسندھ پولیس آئندہ عام انتخابات اور عوامی اجتماعات میں اہم سیاسی شخصیات اور وی وی آئی پیز کے خطاب کے دوران فول پروف سیکورٹی کی فراہمی اور کسی قسم کے ناخوشگوار واقعات سے بچنے کیلئے بلٹ پروف روسٹرمز خرید نے پر غور کر رہی ہے۔پی پی آئی کے مطابق شیشے کے بنے بلٹ پروف روسٹرم کی قیمت 30لاکھ روپے سے زائدبتائی جاتی ہے،اس حوالے سے بتایاجاتاہے ان روسٹرمزکو صوبے کے مختلف اضلاع میں سپیشل برانچوں کے حوالے کیاجائے گا۔
جام شورو: شیخ الجامعہ سندھ جامشورو پروفیسر ڈاکٹر نذیر اے مغل کی زیر صدارت ایک اہم اجلاس منعقد ہوا، جس میں 27 اکتوبر کو ہونے والے ماسٹرز، ایم ایس/ایم فل اور 3 نومبر کو بیچلرز ڈگری پروگرام میں داخلوں کے لیے ہونے والے پری انٹری ٹیسٹ کے انتظامات کے بارے میں تفصیلی غور کیا گیا۔ اجلاس میں ڈائریکٹر ایڈمیشن اختر احمد میمن، ڈاکٹر انور علی شاہ جی سید، ڈاکٹر امداد علی اسماعیلی، انچارج ڈائریکٹر فنانس بشیر احمد شیخ، ڈاکٹر سلیم چانڈیو، ڈاکٹر نور محمد جمالی، پروفیسر محمد یوسف پردیسی، ڈاکٹر عبدالرسول عباسی، ڈاکٹر اظہر علی شاہ، ڈاکٹر عابدہ طاہرانی، ڈاکٹر محمد صدیق کلہوڑو، ڈاکٹر سرفراز حسین سولنگی، ڈاکٹر حاکم علی قناصرو، ڈاکٹر عبداللہ دایو، ڈاکٹر جاوید اقبال، ڈاکٹر ریاض میمن، ڈاکٹر اسلم پرویز میمن، ڈاکٹر اسد علی شیخ، ڈاکٹر عبدالستار عالمانی، ڈاکٹر پروین منشی، احسان شاہ راشدی، سجاد علی شاہ، انجنیئر قمرالحسن میمن، پرچیز اینڈ اسٹور افسر سلطان بلوچ ، غلام نبی کاکا و دیگر نے شرکت کی۔ اجلاس میں 27 اکتوبر اور 3 نومبر کو منعقد ہونے والے پری انٹری ٹیسٹوں کے انتظامات پر غور و خوض کے بعد سیکیورٹی سمیت دیگر امور کو حتمی شکل دی گئی۔ اجلاس میں ڈائریکٹر ایڈمیشن اختر احمد میمن نے ماسٹرس، بیچلرس اور ایم فل میں داخلے کے لیے جمع ہونے والے فارم کی تعداد کے بارے میں تفصیلی بریفنگ دی، اجلاس میں 3 نومبر پر ہندو برادری کے تہوار دیوالی کے بارے میں تفصیلی غور کرنے کے بعد انٹری ٹیسٹ ملتوی نہ کرنے کا فیصلہ کیا گیا۔
میرپورخاص: میرپورخاص کے علاقے عزیز آباد میں کھلے مین ہول میں گر کر پولیس آفیسر کا چار سالہ بچہ جاں بحق ہو گیا۔ میرپورخاص کے علاقے عزیز آباد میں کھلے ہوئے مین ہول میں گر کر پولیس آفسر ارشد ملک کا چار سالہ بیٹا سعد جاں بحق ہو گیا ،بچے کے انتقال کی اطلاع ملنے پر گھر میں کہرام مچ گیا ماں اور بہنوں پر غشی کے دورے پڑے ،واضح رہے کہ میرپورخاص شہر کے اکثر علاقوں میں مین ہول اور گٹر نالے کھلے ہوئے ہیں جبکہ ٹی ایم اے انتظامیہ اس طرف توجہ ہی نہیں دے رہی جس کی وجہ سے آئے روز معصوم بچے او ر ضیف افراد حادثات کا شکار ہورہے ہیں۔
نئی دہلی: پاکستان نے لائرز کرکٹ ورلڈ کپ کے فائنل میں بھارت کو شکست دے کر ٹائٹل اپنے نا م کر لیا۔فیروز شاہ کوٹلہ کرکٹ اسٹیڈیم نئی دہلی میں چوتھے لائرز کرکٹ ورلڈ کپ کے فیصلہ کن مقابلہ میں گرین شرٹس نے ٹاس جیت کر پہلے بیٹنگ کا فیصلہ کیا۔ پاکستان کی پہلی وکٹ جلد گر گئی۔ کپتان جمال سکھیرا ٹوٹل میں 13 رنز کا اضافہ کر کے پویلین جا بیٹھے۔35 اوور کے اس فائنل میں لائرز کی قومی ٹیم نے بھارت کو 229 رنز کا ہدف دیا۔ جواب میں بھارتی ٹیم 160 رنز پر ڈھیر ہو گئی۔ پاکستان کی جانب سے عبداللہ 4 وکٹیں حاصل کر کے نمائیاں رہے
کولمبو: سری لنکا کرکٹ ٹیم کے سابق کپتان ، موجودہ چیئرمین سیلیکشن اورممبر کوچ تلاش کمیٹی سنتھ جے سوریا نے کہا ہے کہ سری لنکا کو ایک ایسے کوچ کی ضرورت ہے جو گراہم فورڑ کے شروع کئے گئے منصوبوں کو پایہ تکمیل تک پہنچائے نہ کہ نئے منصوبے شروع کرے۔سری لنکاکے کوچ گراہم فورڑ نے جنوری 2014میں معاہدے کی تکمیل کے ساتھ ہی مستعفی ہو نے کا اعلان کیا تھا ،سری لنکاکرکٹ بورڑ کواس سلسلے میں اب تک گیارہ درخواستیں موصول ہو چکیں ہیں لیکن بورڑ نے بہترین انتخاب کے لئے وسیع جال بچھا یا ہے ،انڈیا کرکٹ ٹیم کے سابق کوچ گریگ چیپل بھی ان افراد میں شامل تھے جنھوںنے بورڑ سے اس معاملے پر بات کی تھی لیکن چیپل چند خاندانی وجوہات کے باعث دستبر دار ہو گئے ۔جے سو ریا نے کہا کہ سری لنکا کی ٹیم سے بڑے کھلاڑیوں کی متوقع ریٹائر منٹ سے پیدا ہونے خلا کو پر کرنے کے لئے منتخب کا روں نے 2013میں نوجوان خون کو ٹیم کا حصہ بنا یا ہے ،نئے کوچ کو طویل مدتی منصوبے کوتکمیل تک پہنچانے کی ہامی بھر نی ہو گی جس کا آغاز ہم کر چکے ہیں۔ ہمیں چند نوجوان کھلاڑی ملے ہیں اب دیکھنا یہ ہے کہ اگلے چند سالوں تک کیسی کارکر دگی دکھا تے ہیں ، جے سوریا نے کہا کہ ہمیں ایک ایسے کوچ کی تلاش ہے جونوجوان کھلاڑیوںکے ساتھ سخت محنت کر سکے اور انھیں بہترین نتائج کے لئے تیار کرے اورجانتا ہو کہ ان کھلاڑیوں کوکیسے متحرک کیا جا سکتا ہے۔فورڈ نے پچھلے دو سالوں کے دوران ٹیم کے ساتھ ناقابل فراموش کام کیا ہے، انھوں نے سینئر کھلاڑیوں کو ان کی مشکلات دور کرنے کے لئے بھی مدد کی ، جے سوریا کا کہنا تھا کہ بدقسمتی سے سری لنکا کرکٹ فورڑ کو معاہدے کی تکمیل کے بعد کام جاری رکھنے کے لئے رضامند نہیں کر سکی تاہم نئے کوچ کو فورڑ کی صلاحیتوں کا حامل ہونا چاہیے ، ان کا کہنا تھا کہ گراہم فورڈ نے ٹیم کے ہر کھلاڑی کے ساتھ انفرادی طور پر محنت کی اور ہمیں اسی طرح کے کوچ کی ضرورت ہے ،انھوں نے نوجوان کھلاڑیوںپر بہت اچھا کام کیا ہے ،جے سوریا نے یہ بھی کہاکہ نئے کوچ کو سری لنکاکے تہذیب و تمدن سے بھی آگاہ ہونا چاہیے ،ہمیں مقامی کوچ کی بھی تلاش ہے ہم انھیںدیکھیں گے ان کی کارکر دگی کو بھی جانچیں گے کیونکہ انھیں بھی موقع دیا جا سکتا ہے ،کوچ سلیکشن کمیٹی کی مییٹنگ اب کمیٹی کے چیئر مین رنجیت فرنینڈو کی بنگلا دیش سے واپسی پر اکتوبر کے آخر میں ہو گی، کمیٹی کو جنوری میں فورڑ کے جگہ خالی کرنے سے پہلے نیا کوچ مقرر کرنا ہے ،تاہم فرنینڈو اور جے سوریا دونوںنے اس خواہش کا اظہار کیا ہے کہ جلد ہی کو چ کا تقرر عمل میں لایا جائے گا۔
سکھر: پاک نیوی بھرتی مرکز سکھر نے نیوی میں بھرتی کی تاریخ 31اکتوبر تک بڑھا دی ہے ۔پاکستان نیوی بھرتی مرکزسکھر کے آفیسر انچارج کمانڈر محمد علی بھٹی نے کہاہے کہ پاکستان نیوی میں بطور کیڈٹ ٹرم 2014 اے میں بھرتی 14سے 31اکتوبر 2013 تک جاری رہے گی۔ایسے غیر شادی شدہ نوجوان جنھوں نے 60% نمبروں کے ساتھ انٹر پاس کیا ہو،عمریکم جولائی2014کو ساڑھے16سال سے21سال کے درمیان ہو اور قدکم از کم 5.4″ ہو وہ اپنے قریبی پاکستان نیوی بھرتی مرکز سے رابطہ کرکے پاک نیوی میں شمولیت اختیار کرسکتے ہیں۔
حیدرآباد: حکومتِ سندھ کی لاپروائی اور تعصب نے حیدرآباد شہر کو گندگی او رمسائل کا گڑھ بنادیاہے اور صحت و صفائی کی ناقص صورتحال کی وجہ سے شہر بھر میں ڈینگی اور ملیریا کے مریضوں کی تعداد میں اضافہ ہورہاہے۔ان خیالات کا اظہار متحدہ قومی موومنٹ حیدرآباد کے حق پرست اراکین قومی وصوبائی اسمبلی نے اپنے مشترکہ بیان میں شہر بھر میں ڈینگی اور ملیریا کے مریضوں کی بڑھتی ہوئی تعداد پر تشویش کااظہار کرتے ہوئے کیا۔ انہوں نے کہا کہ ماہ ستمبر سے نومبر تک مچھروں کی افزائش کا موسم ہے لیکن انتظامیہ کی نااہلی کی بدولت شہر میں مچھرمار اسپرے نہیں کیے جارہے ہیں ۔انھوں نے کہاکہ حکومت سندھ کی غفلت اور تعصب کی بنا پر حیدرآباد شہرکے فنڈ جاری نہ ہونا عوام کے مسائل میں مزید اضافہ کرنے کے مترادف ہے ، شہر میں اسپرے کرنا انتظامیہ کی ذمہ داری ہے لیکن انتظامیہ اپنے اس فرض میں مسلسل غفلت برت رہی ہے ۔انھوں نے کہاکہ حیدرآباد سٹی میں ڈینگی وائرس سے متاثرہ افراد کی تعداد دن بدن بڑھتی جارہی ہے مگر حیدرآباد شہر میں صحت و صفا ئی کے ناقص انتظامات کی وجہ سے شہر بھر کی گلیوں میں کچرے اور گندگی کے ڈھیر لگے ہوئے ہیں اور جگہ جگہ گندا پانی جمع نظر آتا ہے،انھوں نے کہاکہ حکومت سندھ تعصب سے بالاتر ہوکرسندھ کے شہری علاقوں کی عوام کے مسائل کے خاتمہ کے لیے عملی اقدامات کرے ۔
