لاہور: پاکستان ہاکی فیڈریشن نے جونیئر ہاکی ورلڈ کپ میں ٹیم کے نویں پوزیشن حاصل کرنے کے بعد جونیئر ٹیم کی تشکیل نو کرنے کا فیصلہ کرلیا ۔ جونیئر ٹیم کے لئے نئی انتظامیہ کا اعلان قومی ہاکی چیمپئن شپ کے بعد کیا جائے گا ۔ موجودہ انتظامیہ کے پاکستان ہاکی فیڈریشن کے ساتھ تمام معاہدے ختم ہوگئے ہیں ۔

لاہور: بھارت کی بیس بال ٹیم آئندہ سال جنوری میں پاکستان کا دورہ کرے گی ۔دورے کے دوران پاکستان اور بھارت کے درمیان تین میچوں کی سیریز کھیلی جائے گی ۔ پنجاب بیس بال ایسوسی ایشن کے سیکریٹری مظہر شیخ نے سری لنکا میں منعقد ریفری و ججز کورس کے دوران بھارتی بیس بال فیڈریشن کو پاکستان کے دورے کی دعوت دی تھی ۔فیڈریشن کے سیکریٹری سید خاور شاہ کے مطابق جنوری کے تیسرے ہفتے میں شیڈول سیریز کے میچ لاہور ،گوجرانوالہ اور فیصل آباد میں کھیلے جائیں گے ۔

پشاور: پاکستان کے ٹاپ اسکواش اسٹار فرحان زمان نے کہا ہے کہ انہوں نے امریکا میںکھیلے جانے والے انٹرنیشنل ٹورنامنٹس میں شاندار کارکردگی کا مظاہرہ کیا اور انہیں امید ہے کہ ان کی عالمی درجہ بندی میں پوزیشن بہتر ہوجائے گی ۔ ان خیالات کااظہار فرحان نے ملک سعد میموریل اسپورٹس ٹرسٹ کے دورے کے موقع پر کیا ۔فرحان نے مزید کہا کہ امریکا اور کینیڈا کے مختلف ایونٹس میں شرکت کرکے ان کے اعتماد میں اضافہ ہوا ہے ۔

رباط( پی پی آئی)فیفا کلب ورلڈ کپ میں بائرن میونخ کی ٹیم نے فائنل میں جگہ بنا لی،مراکش میں کھیلے گئے فٹ بال ٹورنامنٹ کے سیمی فائنل میں جرمنی کی ٹیم میونخ کا سامنا چین کی ٹیم گوانگڑو سے ہوا۔میونخ کی ٹیم نے پہلے ہاف میں دو گول داغ کر میچ کا فاتحانہ آغاز کیا،دوسرے ہاف میں بھی بائرن کی ٹیم نے برتری برقرار رکھتے ہوئے تیسرا گول سکور کر کے تین صفر سے کامیابی اپنے نام کی اور فائنل میں جگہ حاصل کر لی۔

لاس اینجلس: امریکا نیشنل باسکٹ بال ایسو سی ایشن میں ایل اے لیکرز کی ٹیم نے ممفس کو سخت مقابلے کے بعد شکست دیدی۔لاس اینجلس میں ہونیوالے باسکٹ بال میچ میں دونوں ٹیموں کے درمیان دلچسپ مقابلہ ہوا،لاس اینجلس کی ٹیم کو فائنل پیریڈ میں اس وقت کامیابی حاصل ہوئی جب سٹار کھلاڑیوں کوب برائنٹ اور پاﺅ گوسال نے شاندار کاکردگی دکھاتے ہوئے حریف ٹیم کے خلاف پوائنٹس بنائے اور برتری حاصل کی۔لاس اینجلس نے میزبان میمفیز کو بانوے کے مقابلے میں چھیانوے پوائنٹس سے شکست دی،فاتح ٹیم کی جانب سے کوبے برائنٹ نے سب سے زیادہ اکیس پوائنٹس سکور کیے۔

دبئی: پاکستان کے اوپننگ بیٹسمین احمد شہزاد پرجرمانہ لگنے کا امکان پیدا ہوگیا۔ احمد شہزاد ریویو نہ دینے پرامپائر سے بحث میں لگے رہے۔ سری لنکا کے خلاف پہلے ون ڈے میں اوپننگ بیٹسمین احمد شہزاد نے ابھی گیارہ رنز ہی بنائے تھے کہ سرنگا لکمل کی گیند پرکی گئی ایک جاندار اپیل پرامپائر نے انہیں ایل بی ڈبلیو قراردیدیا۔احمد شہزاد فیصلے سے ناخوش دکھائی دئیے اور ریویو لینا چاہتے تھے لیکن انہوں نے ساتھی کھلاڑی شرجیل خان سے مشاورت میں مقررہ وقت ضائع کردیا جس کے بعد امپائر نے احمد شہزاد کو ریویولینے سے روک دیا۔امپائر کی جانب سے منع کرنے کے باوجود احمد شہزاد نے حسب روایت بحث شروع کردی جس کا ری پلے میچ کے دوران بار بار دکھایا گیا۔ اگردونوں امپائرزنے معاملہ میچ ریفری کورپورٹ کردیا توآئی سی سی کوڈ آف کنڈکٹ کی خلاف ورزی کرنے پراحمد شہزاد جرمانے کی زد میں آسکتے ہیں۔ احمد شہزاد اپنے جارحانہ رویے کی وجہ سے ماضی میں بھی ٹیم سے باہررہ چکے ہیں۔