لاہور(پی پی آئی)انسداد دہشت گردی عدالت نے 9 مئی جلاؤ گھیراؤ کے مقدمات میں رہنما پی ٹی آئی اسد عمر اور پارٹی چیئرمین عمران خان کی دونوں بہنوں سمیت دیگر ملزمان کی عبوری ضمانت میں 4 اکتوبر تک توسیع کردی۔ لاہور کی انسداد دہشت گردی عدالت میں اسد عمر سمیت سمیت دیگر ملزموں کی 9 مئی جلاؤ گھیراؤ کے مقدمات میں عبوری ضمانتوں پر جج عبہر گل نے سماعت کی، پی پی آئی کے مطابق اسد عمر اور دیگر نے عدالت میں پیش ہو کر حاضری مکمل کروائی، علیمہ خان روسٹرم پر آئیں اور عدالت سے مخاطب ہوتے ہوئے کہا کہ میں جناح ہاؤس نہیں گئی مگر مجھے نامزد کردیا گیا، ہم عدالت انصاف کے لیے آئے ہیں، ہمیں انصاف دیا جائے۔ دریں اثنا عدالت نے اسد عمر اور چیرمین پی ٹی آئی کی دونوں بہنوں سمیت دیگر ملزمان کی عبوری ضمانت میں 4 اکتوبر تک توسیع کردی اور پولیس سے تفتیش کا مکمل ریکارڈ طلب کرلیا۔دوسری جانب جناح ہاؤس حملہ کیس میں ملوث 34 ملزمان کی ضمانتوں پر سماعت ہوئی،انسداد دہشت گردی عدالت کی ایڈمن جج عبہر گل خان نے کیس پر سماعت کی،خدیجہ شاہ اور دیگر کی درخواست ضمانت سماعت 23 ستمبر تک ملتوی کر دی گئی۔

 اسلام آباد (پی پی آئی) الیکشن کمیشن نے ملک بھر میں موجود ووٹرز کی تعداد جاری کر دی ہے، پی پی آئی کے مطابق اعدادوشمار میں ووٹ ڈالنے کی اہلیت رکھنے والے شہریوں کی تعداد 12 کروڑ، 69 لاکھ 80 ہزار سے زائد بتائی گئی ہے۔الیکشن کمیشن کے مطابق 2018 میں 10 کروڑ 59 لاکھ 55 ہزار 409 ووٹرز رجسٹرڈ تھے، اب یہ تعداد 12 کروڑ، 69 لاکھ 80 ہزار سے تجاوز کر گئی ہے۔خواتین ووٹرز کی تعداد 5 کروڑ 84 لاکھ 72 ہزار 14 ہے، جبکہ مرد ووٹرز کی تعداد 6 کروڑ 85 لاکھ 8 ہزار258 ہے، پنجاب میں ووٹرز کی تعداد 7 کروڑ 23 لاکھ 10 ہزار 582 ہے اور سندھ میں ووٹرز کی تعداد 2 کروڑ 66 لاکھ 51 ہزار 161 ہے۔الیکشن کمیشن کے مطابق خیبر پختونخوا میں ووٹرز کی تعداد 2 کروڑ 16 لاکھ 92 ہزار 381 ہے، بلوچستان میں ووٹرز کی تعداد 52 لاکھ 84 ہزار 594 ہے، اسلام آباد میں ووٹرز کی تعداد 10 لاکھ 41 ہزار 554 ہے۔ملک میں 18 سے 35 سال عمر کے ووٹرز کی تعداد 5 کروڑ 70 لاکھ 95 ہزار 197 ہے، 36 سے 45 سال کے ووٹرز کی کل تعداد 2 کروڑ 77 لاکھ 94 ہزار 708 ہے، 46 سے 55 سال عمر کے ووٹرز کی تعداد 1 کروڑ 81 لاکھ 24 ہزار 28 ہے، 56 سے 65 سال کے ووٹرز کی مجموعی تعداد 1 کروڑ 18 لاکھ 89 ہزار 259 ہے۔الیکشن کمیشن کے مطابق ملک میں 66 سال سے زائد عمر والے ووٹرز کی تعداد 1 کروڑ 20 لاکھ 77 ہزار 80 ہے۔

ریاض  (پی پی آئی)سعودی عرب میں سفارت خانہ پاکستان کے ویلفیئر اتاشی سہیل بابر وڑائچ کا کہنا ہے کہ سعودی عرب میں ہاسپٹلٹی کے شعبے میں پاکستانیوں کے لئے بے شمار ملازمتوں کے مواقع موجود ہیں ان خیالات کا اظہار انہوں نے سعودی عرب میں ہوٹل اینڈ ٹورازم انڈسٹری کے حوالے سے منعقدہ ویبنار کے شرکاسے اظہار خیال کرتے ہوئے کیا. ویبنار میں پاکستان سمیت دیگر ممالک سے پاکستانیوں کی بڑی تعداد آن لائن شریک تھی اس موقعہ پر شرکا  سے مزید گفتگو کرتے ہوئے ویلفیئر اتاشی سہیل بابر وڑائچ نے سعودی عرب میں ہوٹل اینڈ ٹورازم انڈسٹری کے خدوخال اور نوجوانوں کے لئے ملازمتوں کے مواقعوں کے حوالے سے آگاہ کیا اور بتایا کہ اگر پاکستان سے ہمارا نوجوان طبقہ ہاسپٹلٹی کے کورسز کرکے سعودی عرب میں اس حوالے سے کمپنیوں سے رابطہ کریں تو نا صرف انہیں آسانی کے ساتھ کمپنی ویزے کا حصول ممکن ہوگا بلکہ انہیں اچھی ملازمت بھی مل جائے گی۔سہیل بابر وڑائچ کا مزید کہنا تھا کہ اس وقت سعودی عرب میں ریڈ سی پروجیکٹ سمیت نیوم اور العلاو دیگر اہم منصوبوں میں ہاسپٹلٹی ملازمتوں کے بے شمار مواقع موجود ہیں وڑائچ کا کہنا تھا کہ پاکستان میں ہاسپٹلٹی کورسز گورنمنٹ سیکٹر کے علاوہ اقرایونیورسٹی اور قائداعظم یونیورسٹی سمیت دیگر تعلیمی ادارے بھی کورسز کروا رہے ہیں جن سے ہماری یوتھ بہتر انداز میں کورسز کرکے سعودی عرب میں مناسب ملازمت حاصل کر سکتے ہیں.

 اسلام آباد (پی پی آئی) الیکشن کمیشن نے عام انتخابات میں آر اوز کو نئے لیپ ٹاپ دینے کا فیصلہ کیا ہے۔پی پی آئی کے مطابق الیکشن کمیشن نے ریٹرننگ افسران کو عام انتخابات کیلئے نئے لیپ ٹاپ دینے کا  جوفیصلہ کیا ہے،  اس پر رائے عامہ کا کہنا ہے کہ ملک کی معاشی حالت اس قدر خراب ہے کہ ایک جانب عوام  دو وقت کی روٹی کو ترس رہے ہیں تو  دوسری جانب سرکاری ادارے شہ خرچیاں کرنے میں مگن ہیں۔