مٹیاری)پی پی آ ئی) مسلم لیگ سندھ استقبالیہ کمیٹی کے سربراہ بشیر میمن نے کہا کہ جے یو آئی اور ایم کیو ایم کے ساتھ انتخابی اتحاد کریں گے۔مسلم لیگ سندھ استقبالیہ کمیٹی کے سربراہ بشیر میمن نے محمد زبیر، نہال ہاشمی، شاہ محمد شاہ کے ساتھ پریس کانفرنس کرتے ہوئے کہا کہ یہاں پر سارے ضلع سے عہدیداران کو بلایا تھا، سندھ کے 5 ڈویژن کے لوگوں نے بڑی تعداد میں شرکت کی ہے، مریم نواز نے بھی کارکنوں سے ٹیلیفونک بات چیت کی ہے۔محمد زبیر نے کہا کہ جس جوش وخروش سے کارکن آئے ہیں وہ قبل تحسین ہے، سندھ کے ہر شہر اور قصبے سے لوگ میاں نواز شریف کے ساتھ ہیں، میں نے اتنا جوش و جذبہ پہلے نہیں دیکھا، سندھ سے کارکن اپنے قائد کے استقبال کے لئے جائیں گے، 21 اکتوبر کو پتہ چل جائے گا کون سی جماعت سب سے زیادہ مقبول ہے، انشاء اللہ ہم سندھ میں بھی حکومت بنائیں گے۔بشیر میمن نے کہا مسلم لیگ ن، جے یو آئی اور ایم کیو ایم کے ساتھ انتخابی اتحاد کرے گی، نہال ہاشمی نے کہا کہ بشیر صاحب کا ماضی شاندار ہے وہ ایماندار شخص ہیں، سندھ میں پہلے بھی حکومت بنائی اور اب بھی بنائیں گے، نواز شریف ملک و قوم کے لئے سوچتے ہیں۔

مظفرآباد)پی پی آ ئی) مظفرآبادمیں 8اکتوبر2005 کے ہولناک زلزلہ کو 18سال مکمل ہو گئے۔سٹیٹ ارتھ کوئیک ری کنسٹرکشن اینڈ ری ہیبلیٹیشن ایجنسی(سیرا)نے تعمیرنو منصوبوں کی تفصیلات جاری کردیں،8اکتوبر 2005کے قیامت خیز زلزلہ سے مظفرآباد،باغ راولاکوٹ، نیلم اور جہلم ویلی میں تباہی آئی، 7.6ریکٹرسکیل کی شدت کے زلزلہ سے46ہزار سے زائد افراد لقمہ اجل بنے،8اکتوبر کے زلزلہ میں 33ہزارزخمی،3لاکھ نجی املاک تباہ ہوئیں۔ زلزلے کے بعد متاثرہ علاقوں میں شروع ہونے والا تعمیرنو کا عمل18سال کے بعد بھی مکمل نہ ہوسکا،متاثرہ علاقوں کے 811منصوبوں پر تعمیر کیلئے پہلی انیٹ تک نہیں رکھی گئی،تعمیرنو کے متاثرہ علاقوں میں 919منصوبے ادھورے ہیں،سب سے زیادہ تعلیمی اداروں کے597منصوبوں پر کام کا آغاز ہی نہیں ہو سکا،515تعلیمی اداروں پرجاری منصوبے مکمل کرنے کیلئے فنڈز دستیاب نہیں۔آزادکشمیر کے2لاکھ سے زائد بچوں کیلئے تعلیمی اداروں کوچھت میسر نہیں، صحت کے 20منصوبوں کی تعمیر شروع نہ ہوسکی،21جاری منصوبے زیرالتواہیں، تعمیرنو کا عمل مکمل کرنے کیلئے 51ارب روپے کے فنڈز درکار ہیں،حکومت پاکستان کی جانب سے اپریل 2021 کے بعد فنڈز مہیا نہیں کئے گئے۔سیکرٹری سیرا جاویدالحسن کاکہنا ہے کہ زلزلہ میں نقصانات کا مجموعی تخمینہ125ارب روپے لگایا گیا،قیامت خیز زلزلہ سے آزادکشمیر کی 56فیصد آبادی متاثر ہوئی‘تعمیرنوکے ادارے سیرا کا زلزلہ متاثرہ علاقوں میں 77 فیصد کام مکمل ہونے کا دعویٰ لیکن عوام مایوس ہیں، تعمیرنو پروگرام کے تحت متاثرہ علاقوں میں 7608منصوبے ڈیزائن،5878مکمل کرلئے گئے۔

لاہور)پی پی آ ئی)استحکام پاکستان پارٹی (آئی پی پی) نے جلسوں کے شیڈول میں تبدیلی کر دی، پہلا پاور شو 13 کے بجائے 28 اکتوبر کو خانیوال میں ہوگا۔مرکزی سیکرٹری اطلاعات فردوس عاشق اعوان کے مطابق استحکام پاکستان پارٹی کے جلسوں کی ترتیب میں قیادت کی مصروفیات اور نئی سیاسی حکمت عملی کی وجہ سے جزوی رد و بدل کیا گیا ہے۔نئی ترتیب کے مطابق آئی پی پی اپنا پہلا پاور شو 28 اکتوبر کو خانیوال میں کرے گی، جھنگ پاور شو کی نئی تاریخ کا جلد اعلان کیا جائے گا۔استحکام پاکستان پارٹی کی سیکرٹری اطلاعات نے مزید کہا کہ آئی پی پی کی عوامی رابطہ مہم کسی بھی صورت تعطل کا شکار نہیں ہونے دیں گے، تاہم یہ عوامی رابطے اور جلسے سینئر قیادت کی سربراہی میں ہی کئے جائیں گے۔خیال رہے کہ استحکام پاکستان پارٹی نے اپنا پہلا سیاسی پاور شو 13 اکتوبر کو جھنگ میں کرنے کا اعلان کر رکھا تھا۔

لاہور)پی پی آ ئی) پاکستان مسلم لیگ ن کے رہنما و سابق رکن پنجاب اسمبلی عظمیٰ بخاری نے کہا ہے کہ قائد نواز شریف 21 اکتوبر کو ضرور پاکستان آئیں گے۔پریس کانفرنس کرتے ہوئے لیگی رہنما عظمیٰ بخاری کا کہنا تھا کہ نوازشریف کے پاس ملک کو بحرانوں سے نکالنے کا وسیع تجربہ ہے، قائد مسلم لیگ ن کو جب جب اقتدار سے نکالا گیا تو کہا گیا ان کی سیاست ختم ہوگئی مگر وہ ہمیشہ مضبوطی کے ساتھ واپس آئے۔انہوں نے کہا کہ ایک جماعت نے ملک کو انتشار کی جانب دھکیلا، 50 لاکھ گھروں کے خواب دکھانے کے بعد لوگوں کو لنگرخانے دیئے گئے، 2017 میں پاکستان کو 24 بڑی معیشتوں میں شامل کرنے کی بات ہو رہی تھی، 2013 میں لوڈشیڈنگ جیسے بڑے جن کو بوتل میں بند کیا گیا، ہمارے دور میں سی پیک جیسا بڑا پراجیکٹ پاکستان میں شروع کیا گیا۔لیگی رہنما کا مزید کہنا تھا کہ 2017 میں دراصل نوازشریف کے ساتھ نہیں ملکی ترقی کے خلاف سازش کی گئی، پروپیگنڈا کیا گیا کہ نوازشریف واپس نہیں آ رہے، نوازشریف 21 اکتوبر کو ضرور واپس آئیں گے۔