ملتان(پی پی آئی)حضرت بہاؤالدین زکریا ملتانیؒ کے مزار پر غسل کی تقریب بد نظمی کا شکار ہو گئی۔ سابق وزیرخارجہ شاہ محمود قریشی کے بیٹے زین قریشی نے مزار کو غسل دیا،ان کے چچا مرید حسین اپنی آمد سے قبل غسل دینے پر برہم ہو گئے،پی پی آئی کے مطابق مرید حسین کی بھتیجے زین قریشی سے تلخ کلامی بھی ہوئی۔ مرید حسین نے کہا کہ میری آمد سے قبل غسل کیوں دیا یہ میرے دادا کی قبر ہے، غسل کی تقریب میں شریک افراد کو بھی کھری کھری سنا دیں،ان کا کہنا تھا کہ مزار کو سیاست کی نذر نہ کریں۔

لاہور(پی پی آئی)محکمہ داخلہ پنجاب نے پنجاب بھر میں ا سٹیج ڈراموں میں فحش اور بیہودہ حرکتیں کرنے والی 18 ڈانسرز پر پابندی عائد کر تے ہوئے فن اور ثقافت کے نام پر فحاشی  کو فروغ دینے والے تھیٹر مالکان اور اداکاروں /ڈانسرز کے خلاف کریک ڈاؤن شروع  کردیا ہے۔پی پی آئی کے مطابق پہلے مرحلے میں، محکمہ داخلہ نے پنجاب آرٹس کونسل (پی اے سی) کی سفارش پر 18 اسٹیج ڈانسرز کو شوکاز نوٹس جاری کیے اور انہیں اپنی حرکتوں کا جواز پیش کرنے کے لیے ایک ہفتے کی مہلت دی۔ دوسرے مرحلے میں سٹیج ڈراموں کے نام پر فحاشی اور عریانی پھیلانے پر محکمہ داخلہ کی جانب سے صوبے بھر میں ڈانسرز پر پابندی عائد کر دی گئی۔  پنجاب آرٹس کونسل کی ٹیمیں تمام تھیٹرز میں ڈراموں کو مانیٹر کر رہی ہیں اور جہاں بھی غیر اخلاقی پرفارمنس پائی گئی اس کے خلاف سخت کارروائی کی جائے گی۔

کراچی (پی پی آئی) وفاقی حکومت نے تجارت کے فروغ کیلئے دیگر شہروں کی طرح کراچی میں بھی بزنس پارک قائم کرنے کا فیصلہ کیا  ہے،ملکی برآمدات میں اضافے  میں بزنس پارک  کے قیام سے مدد ملے گی۔پی پی آئی کے مطابق کراچی کے ایکسپورٹرز اور تاجروں کی نمائندہ تنظیموں سے وفاقی حکومت نے مشاورت کیلئے رابطہ کیا ہے تاکہ عالمی تجارتی رابطوں کو مستحکم کیا جا سکے، اس مقصد کیلئے بڑے شہروں اور نوری آباد، ٹنڈو آدم، کوٹری، دھابے جی اور گھوٹکی میں بھی بزنس پارک قائم کرنے کا پلان ہے۔

کراچی (پی پی آئی) ای او بی آئی کے پنشن یافتگان کی تنظیم ای او بی آئی پنشنرز فورم نے  افسوس ظاہر کیا ہے کہ سابق وفاقی وزیر خزانہ اسحٰق ڈارکے بجٹ تقریر میں اعلان کردہ اضافہ سے ای او بی آئی کے پنشنر ز ہنوزمحروم ہیں کیونکہ ای او بی آئی حکام کا کہنا ہے کہ وفاقی حکومت نے ہنوز نوٹی فی کیشن جاری نہیں کیا اس لئے ستمبرمیں ملنے والی اگست کی پنشن بھی 10ہزار نہیں بلکہ حسب سابق ساڑھے آٹھ ہزار ہی ہوگی حالانکہ وفاقی اور صوبائی حکومتوں کے بجٹ تقاریر میں اعلان کردہ اضا فوں کے نوٹی فی کیشن جاری ہو چکے ہیں اور حاضر سروس اسٹاف او ریٹائرڈ پنشنرز کو اگست میں ہی بڑھائی گئی تنخواہ اور پنشن ہی ملی تھی۔ پی پی آئی کے مطابق ای او بی آئی کے پنشن یافتگان کی کل پاکستان تنظیم ای او بی آئی پنشنرز فورم نے نگراں وزیر اعظم  انوارالحق کی توجہ دلائی ہے کہ ای او بی آئی پنشن میں آخری اضافہ جنوری 2020 میں کیا گیا تھا۔ قانون کے مطابق ہر تین برس بعد ای او بی آئی کی پنشن میں اضافہ واجب ہو جاتا ہے۔ لہذا  سابق وفاقی وزیر خزانہ اسحٰق ڈار کی بجٹ تقریر میں اعلان کردہ اضافہ کا اطلاق جنوری 2023سے کیاجائے