کراچی (پی پی آئی) کراچی سٹی، کینٹ اور ڈرگ روڈ اسٹیشن پرریلوے ملازمین نے تنخواہوں میں مسلسل تاخیر کیخلاف احتجاج اور مظاہرہ کرتے ہوئے دھرنا دیا۔پی پی آئی کے مطابق مظاہرین نے اپنے مطالبات کے حصول کے لئے نعرے بازی کی اور مطالبہ کیا کہ ریلوے کے غریب ملازمین کو فوری تنخواہیں ادا کی جائیں۔
کراچی/سکھر(پی پی آئی) کراچی اور سکھر میں مبینہ پولیس مقابلوں کے بعد 4 ڈاکوؤں کو زخمی حالت میں گرفتار کر لیا گیا جبکہ 2 فرار ہونے میں کامیاب ہو گئے ہیں۔پی پی آئی کے مطابق کراچی کے علاقے سائٹ سپر ہائی وے بشیر چوک کے قریب ڈاکو لوٹ مار میں مصروف تھے کہ پولیس موقع پر پہنچی تو ملزموں نے فائرنگ شروع کر دی، جوابی کارروائی میں دو ڈاکوؤں کو زخمی حالت میں حراست میں لے لیا گیا، ملزمان کی شناخت شان مختار اور بلال ظہیر کے نام سے ہوئی ہے، ملزموں سے اسلحہ، نقدی، موبائل فونز اور موٹر سائیکل برآمد کر لی گئی۔سکھر میں ریلوے کوارٹرز کے قریب بھی پولیس مقابلے کے بعد دو ڈاکوؤں کو زخمی حالت میں گرفتار کیا گیا ہے جبکہ ان کے دو ساتھی فرار ہونے میں کامیاب ہو گئے، گرفتار ملزم غلام حیدر میرانی اور دلبر اوڈھ پولیس کو سنگین مقدمات میں مطلوب تھے، ملزموں سے اسلحہ بھی برآمد کر لیا۔
کراچی (پی پی آئی) شہر قائد میں آشوب چشم کی وبا ایک بار پھرتیزی سے پھیلنے لگی ہے۔ سرکاری و نجی ہسپتالوں میں مریضوں کی تعدادمیں اضافہ ہونے لگا ہے۔ ماہر امراض چشم ڈاکٹر شاہ نواز منعمی نے پی پی آئی کو بتایا کہ اس بیماری سے صحت یاب ہونے میں دس سے پندرہ روز لگ جاتے ہیں۔ ایسے مریضوں کو لوگوں سے ملنے میں احتیاط کرنی چاہئے کیونکہ یہ بیماری ہوا اور سانس کے ساتھ بھی پھیلتی ہے۔ مریض کا تولیہ الگ کر دینا چاہئے اور بچوں کو مریض سے دور رکھا جائے۔ پی پی آئی کے مطابق ماسک پہننے اور سینی ٹائزر کے استعمال سے بھی اس بیماری کے اثرات سے پچا جا سکتا ہے۔
کندھ کوٹ (پی پی آئی)پاکستان رینجرز اور سندھ پولیس نے کچے کے ڈاکوؤں کے خلاف کومبنگ آپریشن شروع کر دیا ہے۔پی پی آئی کے مطابق سندھ رینجرز اور پولیس نے انٹیلی جنس معلومات کی بنیاد پرکومبنگ آپریشن کرتے ہوئے کندھ کوٹ کے کچے میں واقع گاؤں اللہ ورایو سے ممدانی گینگ کے 7 ملزمان کو گرفتار کر لیا، ملزمان کے قبضے سے مختلف نوعیت کا جدیداسلحہ بھی برآمد کیا گیا۔ترجمان رینجرز نے کہا ہے کہ مذکورہ علاقہ بلوچستان کے قریب اور نوگو ایریا تھا، گرفتار ملزمان ممدانی گینگ کے سہولت کار ہیں، پاکستان رینجرزسندھ کا ڈاکوؤں کے خاتمے تک آپریشن جاری رہے گا۔
سان میگوئیل: نیدرلینڈز نے آسٹریلیا کوپانچ ایک سے شکست دے کر ویمنز ورلڈ ہاکی لیگ کا ٹائٹل جیت لیا۔ سان میگوئیل میں کھیلے گئے فائنل میں اولمپک چیمپئن نے ایک گول کے خسارے میں جانے کے باوجود ہاکی رووز کو زیر کیا۔ انگلینڈ نے میزبان ارجنٹائن کو شکست دے کربرونزمیڈل جیتا۔
لاہور: دورہ جنوبی افریقا سے ایک روزہ سیریز جیتنے کے بعد کرکٹرز کی وطن واپسی شروع ہو گئی ،قومی ٹیم کے کپتان مصباح الحق کا کہنا تھا کہ سیریز جیتنے کے باوجود ٹیم میں مستقل مزاجی نہ آ سکی۔لاہور ائیر پورٹ پر قومی کرکٹ ٹیم کے کپتان نے نوجوان کھلاڑیوں کی کارکردگی کو سراہتے ہوئے کہا جنوبی افریقا میں سیریز جیتنا بہت بڑی بات ہے تاہم ٹیم کو بیٹنگ میں بہت محنت کی ضرورت ہے،باولنگ کے جادوگر سعید اجمل نے بھی جنوبی افریقا سے سیریز جیتنے پر خوشی کا اظہار کیا،ان کا کہنا ہے کہ اچھی پرفارمنس دینے کی کوشش ہے،بیٹنگ پر کافی محنت کر رہے ہیں۔ آل راونڈر شاہد آفریدی تنقید کرنے والوں پر برس پڑے۔ان کا کہنا تھا کہ ٹی وی پر بیٹھ کر تبصرہ کرنے والے کیا کبھی میچ نہیں ہارے،ٹیم کی حوصلہ افزائی ہونی چاہئے۔قومی ٹی ٹونٹی کرکٹ ٹیم کے کپتان محمد حفیظ نے اپنی کارکردگی کو بہتر بنانے کے عزم کا اظہار کیا۔قومی کرکٹ ٹیم کے کھلاڑی احمد شہزاد، عمر اکمل، ناصر جمشید بھی لاہور پہنچ گئے ہیں، قومی ٹیم کے مینیجر معین خان کراچی پہنچے۔
لاہور: قومی کرکٹ ٹیم کے کپتان مصباح الحق نے تیسرے ون ڈے میں 79 رنز بنا کر کئی ریکارڈ توڑ دیئے۔ کپتان نے رواں سال نصف سنچریاں بنانے کا قومی ریکارڈ توڑ دیا جبکہ عالمی ریکارڈ برابر کر دیا۔ سال میں سب سے زیادہ نصف سنچریاں بنانے کا قومی ریکارڈ یونس خان جبکہ عالمی ریکارڈ گیری کرسٹن اور سچن ٹنڈولکر کے پاس تھا۔ سینچورین میں کھیلے گئے تیسرے ون ڈے میں بلے بازوں کے فلاپ ہونے کے بعد کپتان مصباح الحق نے ذمہ دارانہ بیٹنگ کا مظاہرہ کرتے ہوئے 79 رنز کی اننگز کے دوران کئی سنگ میل عبور کئے اور کئی منزلوں کے قریب پہنچ گئے۔ مصباح الحق نے رواں سال تیرہ نصف سنچریاں سکور کرکے سال میں سب سے زیادہ نصف سنچریاں بنانے کا قومی ریکارڈ قبضے میں کیا جبکہ عالمی ریکارڈ برابر کر دیا۔ قومی ریکارڈ یونس خان کے پاس جبکہ عالمی ریکارڈ کے مالک گیری کرسٹن اور سچن ٹنڈولکر تھے۔ مصباح الحق سال میں ون ڈے میں سب سے زیادہ رنز بنانے والے کھلاڑیوں میں بھی دوسرے نمبر پر آ گئے ہیں جبکہ ٹاپ پوزیشن پر موجود ویرات کوہلی سے چودہ رنز کی دوری پر ہیں۔ مصباح سال میں چوبیس چھکے لگا کر سب سے زیادہ چھکے لگانے والوں کی فہرست میں تیسرے نمبر پر آ گئے ہیں۔ جارج بیلی اور روہت شرما تیس چھکوں کے ساتھ بالترتیب دوسرے اور تیسرے نمبر پر ہیں۔
لاہور: جونیئر ہاکی ورلڈ کپ میں شرکت کیلئے قومی ٹیم واہگہ کے راستے بھارت روانہ ہو گئی،کپتان عمر بھٹہ کا کہنا تھا کہ ٹورنامنٹ جیت کر قوم کو خوشی دیں گے۔چھ دسمبر سے نئی دہلی میں شروع ہونے والے ہاکی ورلڈ کپ میں شرکت کیلئے پاکستانی ٹیم بھارت روانہ ہوئی۔روانگی سے پہلے میڈیا سے گفتگو کرتے ہوئے جونئیر ہاکی ٹیم کے کوچ منظور الحسن نے کہا کہ ٹورنامنٹ کے ابتدائی میچز کافی اہمیت کے حامل ہیں۔کوچ منظور الحسن نے کہا کہ سینئرز کے ساتھ پریکٹس کے بعد کھلاڑیوں کے حوصلے کافی بلند ہیں۔کپتان عمر نے کہا کہ ہر میچ کو فائنل سمجھ کر کھیلیں گے،لڑکوں نے بہت محنت کی ہے،جیت کیلئے پر امید ہیں،کپتان عمر بھٹہ نے کہا کہ تمام کھلاڑی مکمل فارم میں ہیں۔
بیونس آئرس: ارجنٹائن فٹ بال لیگ میں بوکا جونیئرز اور لانوس کی ٹیموں کے درمیان میچ دو دو گول سے برابر ہو گیا۔ارجنٹائن میں کھیلے گئے فٹ بال میچ میں دونوں ٹیموں کے درمیان سخت مقابلہ ہوا ،کھیل کے 23ویں منٹ میں میزبان ٹیم لانوس کے کھلاڑی گلوریمو نے پہلا گول کر کے ٹیم کو ایک صفر کی برتری دلائی ، بوکا کی جانب سے سٹرائیکر ایمانوئیل نے گول سکور کر کے حساب برابر کیا۔لانوس کے نے باسٹھویں منٹ میں شاندار کک لگا کر گیند جال میں پھینکی اور برتری دو ایک کی لیکن اس کے تین منٹ بعد ہی بوکا کے کھلاڑی نے سنسنی خیز گول کر کے مقابلہ دوبارہ برابر کر دیا جو میچ کے اختتام تک برقرار رہا ،لیگ میں لانوس کی ٹیم دوسری پوزیشن پر ہے۔
بیونس آئرس: عالمی نمبر ایک امریکی ٹینس اسٹار سرینا ولیمز نے اپنی بہن وینس ولیمزکے ساتھ نمائشی میچ کھیلا۔ارجنٹائن کے شہر بیونس آئرس میں دونوں بہنوں نمائشی میچ میں حصہ لیا،دلچسپ مقابلے کو دیکھنے کے لیے شائقین کی بڑی تعداد نے ایونٹ میں شرکت کی۔وینس ولیمز ڈانس کرتے ہوئے کورٹ میں داخل ہوئیں تو انکے منفرد انداز سے مداح محظوظ ہوئے۔عالمی نمبر ایک سرینا ولیمز نے 15 سالہ ٹینس کیرئیر میں 17 گرینڈ سلیم ٹائٹل اپنے نام کیے جبکہ ان کی بہن وینس سات بار اعزاز حاصل کر چکی ہیں۔
