شاہ پور چاکر (پی پی آئی)جماعت اسلامی  شاہ پور چاکر کے رہنماؤں مسرور احمد خان،ظفر احمد خان اورمحمد رفیق منصوری نے کہا ہے کہ بجلی کے بلوں میں ظالمانہ اضافے کے خلاف 2 ستمبر کو ملک گیر ہڑتال کا اعلان عوام کے دلوں کی آواز ہے نالائق حکمرانوں کی عیاشیوں و غلامانہ پالیسیوں کی وجہ سے بجلی کے بھاری بل عوام کے لیے عذاب بن گئے ہیں۔پی پی آئی کے مطابق  مسرور احمد خان،ظفر احمد خان اورمحمد رفیق منصوری نے کہا کہ مہنگائی اور ظالمانہ ٹیکسز عوام کے لیے ناقابل برداشت اور ملک تیزی انارکی کی طرف بڑھ رہا ہے عوام کے احتجاج کا نوٹس لیکر بجلی بلوں میں کیا گیا اضافہ واپس نہ لیا گیا تو بات حکمرانوں کے ہاتھ سے نکل سکتی ہے۔ عوام پوچھتے ہیں کہ عوام کو آٹا سستا دینے کے لیے اپنے کپڑے بیچنے اور عالمی مالیاتی اداروں سے قرض لینے کی بجائے خودکشی کو ترجیح دینے کے دعویدار حکمران کہاں غائب ہیں۔ایم کیو ایم، پی ٹی ائی، پی ڈی ایم اور پیپلزپارٹی کے الیکٹرک سمیت عوام کے ساتھ ہونے والے ظلم میں برابر کے شریک ہیں۔  مسرور احمد خان،ظفر احمد خان اورمحمد رفیق منصوری نے کہا کہ ان دھوکہ باز اور سبز باغ دکھانے والوں نے عوام کی امیدوں اور ارمانوں کا قتل کیا ہے۔ اس لیے ملک میں حقیقی تبدیلی اور مسائل کے حل کے لیے عوام کو اپنی ووٹ کی پرچی سے فرسودہ نظام و کرپٹ قیادت سے نجات حاصل کرنا ہوگی۔ ہمارے تمام مسائل کا حل ملک میں قرآن وسنت کا نظام اور دیانتدار قیادت کے برسراقتدار آنے میں مضمر ہے۔

 جنیوا(پی پی آئی)۔ عالمی دارہ صحت نے تمام رکن ممالک کو 2030 تک ہیپاٹائٹس  کے خاتمہ کا ہدف مقرر کردیا ہے۔ جس  میں پاکستان بھی شامل ہے۔ پی پی آئی کے مطابق اس وقت دنیا بھر میں 5کروڑ 80لاکھ افراد ہیپاٹائٹس سی کے مرض میں مبتلا ہیں جبکہ پاکستان میں  مریضوں کی تعداد دنیا میں سب سے زیادہ  یعنی 98لاکھ ہے۔ ان میں سے 90فیصد تو اپنے اس مرض سے آگاہ ہی نہیں ہیں۔پی پی آئی کے مطابق دنیا میں ہیپاٹائٹس  سے یومیہ تین ہزار اموات ہوتی ہیں۔

کوئٹہ(پی پی آئی) بلوچستان یونین آف جرنلسٹس نے ہر سال کی طرح اس مرتبہ بھی پیر28 اگست کویوم شہدا ئے صحافت بلوچستان انتہائی عقیدت و احترام سے منایا۔پی پی آئی کے مطابق صوبہ بھر کے چھوٹے شہروں اور قصبوں تک میں  اجتماعات منعقد ہوئے جن  سے خطاب میں مقررین نے کہا  کہ بلوچستان میں فرائض کی انجام دہی کے دوران یا فرائض کی انجام دینے کی پاداش میں 41 صحافیوں کو شہید کیا گیا ہے ان تمام شہدا کی یاد میں 28 اگست کو شہدا سے موسوم کیا گیا ہے۔اجتماعات میں شریک مختلف مکاتب فکر کی شخصیات،شہدا کے لواحقین، نے شہدا کو ان کی صحافتی میدان میں گرانقدر خدمات اور عوام کو پر خطر حالات میں بھی آگاہ رکھنے پر بھرپور انداز میں خراج عقیدت پیش کیا، ان کی قربانیوں پر روشنی ڈالی نیز شہید صحافیوں کے لواحقین کو انصاف دلانے کیلئے آواز اٹھائی۔

کوئٹہ (پی پی آئی)وفاقی حکومت نے کچھی کینال  پروجیکٹ کی راہ میں حائل رکاوٹوں کو دور کرنے کا حکم دیتے ہوئے اسے جلد از جلد مکمل کرنے کاحکم دیا ہے۔ پی پی آئی کے مطابق وزیر اعظم انوارالحق کاکڑ نے  اپنے حالیہ دورہ  میں بھی متعلقہ اداروں سے  پرویز مشرف دور میں شروع اس منصوبہ کی تکمیل میں تاخیر پر جواب طلب کیا تو انھیں حکام نے بریف کیا  اور یقین دلایا کہ  کچھی کینال  مار چ 2024 تک  مکمل بحال کر دی جائیگی۔پی پی آئی کے مطابق اس فلڈ کینال کی تکمیل سے ایک طرف بلوچستان کا لاکھوں ایکڑ غیر آباد زرعی رقبہ قابل کاشت ہو جائے گا تو دوسری سمت سیلاب کے ایام میں سندھ کے تینوں بیراجوں پر پانی کے دباؤ میں کمی آئے گی۔