سری نگر (پی پی آئی)مقبوضہ جموں و کشمیرحریت رہنما میر واعظ عمر فاروق کی چار برس بعد نظر بندی ختم کر دی گئی جس کے بعد انہوں نے سرینگر کی جامع مسجد میں جمعے کا خطبہ دیا اور نماز بھی پڑھائی۔50 سالہ حریت رہنما  کاسرینگر کی جامع مسجد  پہنچنے پرپرتپاک خیرمقدم کیا گیا،گلپاشی  کی گئی۔پی پی آئی کے مطابق    حریت رہنما میر واعظ عمر فاروق نے غیر ملکی میڈیا کو بتایا کہ جمعے کی صبح ان کے گھر کے اطراف سے پولیس کا محاصرہ ختم کیا گیا ہے۔واضح رہے کہ میر واعظ عمر فاروق کو 5 اگست 2019 کو مقبوضہ کشمیر کی نیم خود مختار حیثیت ختم کرنے کے فیصلے کے بعد گھر میں نظر بند کر دیا گیا تھا۔حریت رہنما نے اپنی نظر بندی کے احکامات کو عدالت میں چیلنج کر رکھا تھا۔بھارتی عدالت نے 15 ستمبر کو اس حوالے سے انتظامیہ کو جواب داخل کرانے کے لیے چار ہفتوں کی مہلت دی تھی۔

اسلام آباد (پی پی آئی)  پاکستان پیپلز پارٹی  کے رہنما نیئر بخاری کا کہنا ہے کہ ریاست کے اختیارات استعمال کرنے کا اختیار عوام کے منتخب نمائندوں کے پاس ہے۔ پی پی آئی کے مطابق نیئر بخاری نیکہا ہے کہ پیپلز پارٹی نے نیب کیسز میں خود کو کوئی ریلیف نہیں دیا،پی پی رہنما پہلے بھی نیب کیسز میں پیش ہوتے رہے ہیں اور اب بھی پیش ہوں گے۔انہوں نے کہا کہ پیپلز پارٹی کبھی گھبرائی ہے اور نہ ہی گھبرائے گی،جتنے بھی نیب مقدمات بنے ہیں پیپلز پارٹی کو کوئی پریشانی نہیں ہوئی۔ نیئر بخاری نے انتخابات پر بات کرتے ہوئے کہا کہ ہم نے 2002 اور 2008 میں بھی بھر پور طریقے سے انتخابی مہم چلائی۔

پشاور (پی پی آئی)’خیبرپختونخوا میں 90 فیصد سے زائد خواتین وراثت میں حصہ سے محروم ہیں۔بتایا جاتا ہے  شرعی حصے  کے حصول میں رکاوٹ بننے والوں کیخلاف فوجداری قانون کے تحت کارروائی کا فیصلہ کیا جارہا ہے۔ پی پی آئی کے مطابق2017 کی مردم شماری کے مطابق خیبرپختونخوا کی کل آبادی 3 کروڑ 55 لاکھ 1 ہزار 964 ہے جس میں خواتین کی تعداد 1 کروڑ 75 لاکھ 3 ہزار 443 ہے جو کل آبادی کا 49 اعشاریہ 30 فیصد ہیں۔خیبرپختونخوا میں معلومات تک رسائی قانون کے ذریعے صوبائی محتسب برائے خواتین کے وراثت میں حقوق کے تحفظ سے حاصل کردہ دستاویز کے مطابق وراثت میں حصہ لینے کے لیے اب تک 1430 خواتین نے شکایات دائر کی ہیں جس میں 975 کیسز تاحال زیر سماعت ہیں۔دستاویز کے مطابق خواتین نے وراثت کے لئے سال 2020 میں 97 میں، 2021 میں 281، 2022 میں 619 اور رواں سال اب تک 433 شکایات جمع کروائی ہیں۔ دستاویز کے مطابق 94 کیسز کو متعلقہ عدالت بھیج دیا گیا ہے، 42 خواتین نے اپنے کیسز واپس لیے، 17 کیسز عدم پیروی کے باعث بند کئے گئے. 25 کیسز کو ہائیکورٹ میں چیلنج کیا گیا۔

لاہور(پی پی آئی) مسلم لیگ (ن)کے رہنما بیرسٹر ظفر اللہ خان نے کہا ہے کہ عمران خان کی ہدایات پر مریم نواز سے جیل میں جھاڑو دلوائی گئی،مگر ہم نہیں چاہتے کہ چیئرمین پی ٹی آئی کے ساتھ بھی جیل میں ایسا ہی سلوک ہو۔پی پی آئی کے مطابق انہوں نے کہا کہ جب تک نواز شریف واپس نہیں آتے 21اکتوبر تک شہباز شریف کا آنا جانا لگا رہے گا،یہ معمول کے معاملات ہیں نواز شریف ضرور آئیں گے۔بیرسٹر ظفر اللہ خان نے کہاکہ پاناما کیس میں نواز شریف کی 66پیشیاں بھگتیں، شاہد خاقان عباسی نے نیب ترامیم سے ریلیف لینے کی درخواست نہیں کی،الیکٹرانک ووٹنگ مشین کے معاملے پر ہم نے سب کمیٹی بنائی،عارف علوی کو سب کمیٹی کا چیئرمین بنایا گیا،میں نے اسحاق ڈار سے کہا علوی صاحب سمجھدار آدمی ہیں،ہم نے ان کو کہا کہ جو سب کمیٹی کہے گی بڑی کمیٹی مان لے گی۔ظفر اللہ خان نے کہا کہ سب کمیٹی نے تحقیقات کی الیکشن کمیشن اور یورپی یونین کے ماہرین بلائے،تمام ماہرین نے سب کمیٹی کو کہا کہ ای وی ایم سسٹم پوری دنیا میں فیل ہو رہا ہے،ان ہی کی کمیٹی کے ریویو کے بعد ای وی ایم کا معاملہ ختم کیا گیا۔