اسلام آباد(پی پی آئی)ڈسٹرکٹ اینڈ سیشن کورٹ اسلام آباد میں چیئرمین پی ٹی آئی کے خلاف تھانہ کورال میں درج مقدمے کی سماعت ک ہوئی۔پی پی آئی کے مطابق ڈسٹرکٹ اینڈ سیشن کورٹ اسلام آباد میں چیئرمین پی ٹی آئی کے خلاف تھانہ کورال میں درج مقدمے کی سماعت ہوئی، چیئرمین پی ٹی آئی کے وکیل نعیم پنجوتھا جوڈیشل مجسٹریٹ نوید خان کی عدالت میں پیش ہوئے،وکیل نے کہاکہ گزشتہ سماعت پر چیئرمین پی ٹی آئی کو عدالت میں لانے کی درخواست کی تھی، چیئرمین پی ٹی آئی کو عدالت لانے پر بہانے بنائے جارہے ہیں،اسی عدالت میں چیئرمین پی ٹی آئی پیش ہو چکے ہیں، سکیورٹی انتظامیہ نے دینی ہے،جج نوید خان نے کہاکہ چیئرمین پی ٹی آئی اس وقت اٹک جیل ہیں، طلب کرنا عام معاملہ نہیں، آپ چیئرمین پی ٹی آئی کی طلبی کی درخواست دیں میں فیصلہ جاری کرتا ہوں۔

 اسلام آباد (پی پی آئی) پاکستان پیپلز پارٹی کے مرکزی رہنما سید خورشید شاہ نے کہا ہے کہ ہم نے نگران وزیراعظم کیلئے کمیٹی بنائی پانچ نام دیے لیکن سب کچھ اوپر اوپر سے ہوگیا۔پی پی آئی کے مطابق   اسلام آباد میں نیوز کانفرنس کے دوران انہوں نے کہا کہ  اب تو بس دعا ہے کہ نگران وزیراعظم شفاف انتخاب کروا دیں،  محسن نقوی کو آصف زرداری نے بچوں جیسا پیار دیا لیکن اگر کوئی پھر جائے تو کیا کیا جا سکتا ہے۔خورشید شاہ کا کہنا تھا کہ  نیب ترامیم کے بارے میں عدالتی فیصلے کا پیپلز پارٹی کو کوئی نقصان یا فائدہ نہیں ہوگا، ہم نے جو بھگتنا تھا، بھگت چکے، میرے دو سال کون لوٹائے گا؟ اس کا جواب کون دے گا۔

لندن (پی پی آئی)ورلڈ حلال فوڈ فیسٹیول 23 اور 24ستمبر کو برطانیہ میں شروع ہوگا۔ برطانوی میڈیا کے مطابق یہ فیسٹیول لندن کے کوئین الزبتھ اولمپک پارک کے اسٹیڈیم میں ہوگا جس میں مسلم کمیونٹی کی بڑی تعداد شرکت کرے گی۔پی پی آئی کے مطابق اس فیسٹیول میں حلال کھانوں اور پکوانوں کے اسٹال لگائے جائیں گے اور کھانے پکانے کا مقابلہ بھی ہوگا۔ اس کے علاوہ پاکستان سمیت متعدد اسلامی ممالک کی ثقافتوں پر مبنی پروگرام بھی رکھے گئے ہیں۔خواتین کی دلچسپی کو برقرار رکھنے کے لیے ایک حصہ شاپنگ کے لیے بھی رکھا گیا جہاں ملبوسات، میک اپ اور دیگر اشیا کے اسٹالز لگائے جائیں گے۔فیسٹیول میں بچوں کے لیے گیمز اور جھولے بھی ہوں گے اسی طرح موسیقی کا بھی اہتمام کیا گیا ہے۔واضح رہے کہ یہ دنیا کا سب سے بڑا حلال فوڈ فیسٹیول ہے جو 8سال بعد ہونے جا رہا ہے اس لیے شہری بہت زیادہ پْرجوش ہیں۔

لاہور(پی پی آئی)مسلم لیگ(ن) کی چیف آرگنائزر مریم نواز کا کہنا ہے کہ جس جس نے نواز شریف کے خلاف سازش کی وہ آج عوام میں نکلنے کے قابل نہیں۔ پی پی آئی کے مطابق مریم نواز نے کہا کہ بے گناہ ہوتے ہوئے بھی بسترِ مرگ پر والدہ کو چھوڑ کر اڈیالہ جیل گئی، قیدِ تنہائی میں رکھا گیا،کمرے میں ہی باتھ روم تھا، نماز پڑھتے ہوئے پتا نہیں چلتا تھا کہ کمرے میں نماز پڑھ رہی ہوں  یا باتھ روم میں، جیل میں ہوتے ہوئے کبھی نہیں کہا کہ مجھے  دیسی چکن چاہیے،جیل کی دال روٹی کھائی، تب سے دال بہت اچھی لگنے لگی ہے۔مریم نواز کا کہناتھا کہ نواز شریف کو سازش کے تحت اقامہ کیس میں نکالا گیا، اس فیصلے کے بعد ملک کی ترقی رْک گئی۔انہوں نے کہا کہ میں 5 ماہ ڈیتھ سیل میں گزار کر آئی مگر انتقام کی سیاست پر یقین نہیں رکھتی، میں دو سو کے قریب پیشیاں بھگت کر سب کے سامنے کھڑی ہوں۔