لاہور: قومی کرکٹر عمر اکمل لاہور میں ٹریفک اشارہ توڑنے پر روکنے والے وارڈن سے الجھ پڑے،آل راﺅنڈر کے خلاف تھانہ گلبرگ میں مقدمہ درج کر لیا گیا۔عمر اکمل نے حسین چوک لاہور میں نہ صرف ٹریفک سگنل توڑا بلکہ روکنے والے ٹریفک وارڈن سے بدتمیزی کی اور اسے معطل کرانے کی دھمکیاں بھی دیں۔اے ایس پی زاہد انور کے مطابق تین ٹریفک وارڈنز نے عمر اکمل کو روکا تو پاکستانی بلے باز نے ٹریفک وارڈن کو تشدد کا نشانہ بنایااور دھمکیاں دیں۔عمر اکمل کیخلاف دفعہ 506،353،186 کے تحت مقدمہ درج کیا گیا ہے۔عمر اکمل نے الزامات کی تردید کر تے ہوئے کہا ہے کہ وارڈنز نے بلاوجہ ان پر تشدد کیا ہے ۔اس سے پہلے سابق اولمپیئن قاسم ضیا کی بیٹی انعم ضیا بھی ایلیٹ فورس کے جوان کو تیز رفتار ڈرائیونگ سے زخمی کر چکی ہیں۔پولیس حکام کا کہنا ہے قانون سب کے لئے برابر ہے ،حکومتی کام میں مداخلت کا مقدمہ درج کر لیا گیا ہے۔

لاہور: قومی کرکٹ ٹیم کے سابق کپتان شعیب ملک نے زندگی کی 32 بہاریں دیکھ لیں۔ یوں توشعیب ملک کے کیریئر میں کئی اتار چڑھاو آئے لیکن بھارتی ٹینس اسٹار ثانیہ مرزا سے شادی کے بعد تو جیسے ان کی کارکردگی کو نظر ہی لگ گئی۔کرکٹ ہیرو کی ٹینس اسٹار ہیروئن کیساتھ جوڑی دنیا بھر میں مقبول ہوئی پر شادی کے بعد کامیابی کے دروازے تو جیسے ملک جی پر بند ہی ہوگئے۔ پاکستان ٹیم کی کپتانی بھی ہاتھ سے جاتی رہی۔ ٹیم سے اندر باہر ہونے کا سلسلہ بھی زور پکڑ گیا۔ کبھی ڈسپلن تنازعوں نے گھیرا، تو کبھی سپر سکسز ٹورنامنٹ میں فکسنگ کی خبروں نے بدنام کیا ۔ شادی کے بعد چار سال میں صرف 54 میچز کھیلے۔ 742 رنز ہی جوڑ سکے وہ بھی اٹھارہ کی اوسط سے، وکٹوں کی تعداد صرف 13 رہی۔شادی سے پہلے کے 54 میچز میں اکتیس اعشاریہ چھ چار کی اوسط سے 1519 رنز جوڑے جن میں تین سنچریاں بھی شامل تھیں اور ساتھ 26وکٹیں بھی اڑائیں۔شادی کے بعد ثانیہ مرزا کی کارکردگی کو بھی زوال آگیا، شادی سے پہلے ثانیہ مرزا نے 30 ٹائٹل جیتے شادی کے بعد سے اب تک ان کے ٹائٹل جیتنے کی تعداد محض 13 ہے۔

لاہور: قومی کرکٹ ٹیم کے سابق کپتان اور1992کرکٹ ورلڈ کپ کے فاتح عمران خان کا کہنا ہے کہ بھارت آسٹریلیا اور انگلینڈ آئی سی سی کی تشکیلِ نو کے نام پر تصادم کے بیج بو رہے ہیں جس سے صرف انہی تین ملکوں کی اجارہ داری قائم ہوگی۔ عمران خان نے ایک انٹرویو میں کہا کہ تین ملکوں کے اس مجوزہ مسودے نے انہیں ماضی کی یاد دلا دی ہے جہاں انگلینڈ اور آسٹریلیا کی اجارہ داری تھی۔ سابق کپتان نے کہا کہ انہوں نے 1993 میں آئی سی سی کے اجلاس میں شرکت کی تھی جہاں وہ انگلینڈ اور آسٹریلیا کی رعونت دیکھ کر حیران رہ گئے تھے۔ ’یہ وہ دور تھا جب ان دو ملکوں کو ویٹو پاور حاصل تھا اور اب لگتا ہے کہ وہ دور واپس لانے کی کوششیں ہو رہی ہیں۔‘ عمران خان کا کہنا تھا کہ پاکستان اور بھارت نے آئی سی سی میں جمہوریت لانے اور دو ممالک کی اجارہ داری ختم کرنے میں اہم کردار ادا کیا تھا لیکن اب بھارت اپنی مالی حیثیت اور انگلینڈ اور آسٹریلیا کی حمایت کے سبب آئی سی سی کو دوبارہ ماضی کی پوزیشن میں لے جانے میں مصروف ہے۔ عمران خان نے کہا کہ اگر وہ پاکستان کرکٹ بورڈ میں ہوتے تو اس نئے نو آبادیاتی نظام کی زبردست مخالفت کرتے۔ آئی سی سی کو کرکٹ کی بہتری کے لیے کام کرنے والا ادارہ بنانے کی ضرورت ہے اس میں چند ملکوں کی اجارہ داری نہیں ہونی چاہیے۔ عمران خان کا کہنا ہے کہ پاکستان کو اپنی کرکٹ کا معیار بلند کرنا ہوگا اور اس کے علاوہ ویسٹ انڈیز کو بھی یہی کچھ کرنے کی ضرورت ہے تاکہ شائقین اور براڈکاسٹرز انہیں اہمیت دے سکیں۔

لاہور: کرکٹرمحمد عامرجلد آئی سی سی کو اپنی سزا کی معافی کیلئے درخواست دینگے،ذرائع کا کہنا ہے کہ پی سی بی ان کی حمایت کرے گا۔ ذرائع کا کہنا ہے کرکٹرمحمد عامراپنی سزا کی معافی کیلئے جلد آئی سی سی کودرخواست دینگے،پی سی بی ان کی سزامعاف کرنے کیلئے درخواست کی حمایت کرے گا،آئی سی سی کے نئے بنائے گئے لیگل سسٹم کے تحت محمد عامرکومعافی مل سکتی ہے،امید کی جارہی ہے کہ محمد عامرکومعافی ملنے کے بعد ڈومیسٹک کرکٹ کھیلنے کی اجازت مل جائے گی،ذرائع کے مطابق محمد عامرکی اپیل آئی سی سی کی ریوائزکمیٹی دیکھے گی،آئی سی سی نے یقین دلایا ہے بگ تھری کے بعد اس معاملہ کو دیکھا جائے گا۔