حیدرآباد: حیدر ا ٓباد میں رشتے کے تنازعے پر نامعلوم افراد کی فائرنگ سے ایک شخص جا ں بحق ہوگیا جبکہ پولیس کی کارروائی میں مختلف واقعات میں مطلوب دو ملزمان کو گرفتار کرلیا۔ قاسم آباد کے علاقہ گلستان سجاد مدینہ کالونی میں رشتہ کے تنازعہ پربنگل بلیدی کو قتل کیا گیا۔ سیلاب متاثرہ آباد خاندان میں ایک رشتہ پر تنازعہ تھا جس پر نامعلوم افراد نے فائرنگ کرکے بنگل بلیدی ولد کرم خان بلیدی کو ہلاک کردیا اور فرار ہو گئے ۔حیدرآباد میں پولیس نے کارروائی کرکے قاسم آباد میں دی سٹی اسکول کے عقب سے کار لفٹر نظیر جمالی کو حسین آباد تھانہ کی حدود سے چھینی گئی کار نمبرAFH-458برآمد کرلی ہے جبکہ ٹنڈو جام اور ٹنڈو قیصر لنک روڈ سے رحمن بخش کھوسو کو گرفتار کرکے 1400کلو گرام افیون برآمد کی اور ہوسٹری موڑ سے آرو ماچھی کو گرفتار کرکے اس سے11لیٹر شراب برآمد کرلی ہے۔

حیدرآباد: جمعیت علماءپاکستان کے صدر ڈاکٹر صاحبزادہ ابوالخیر محمد زبیرنے کہاہے کہ موجودہ حکمراں قوت ارادی و قوت فیصلہ سے محروم ہیں جس کے باعث ملک کے حالات دن بدن بد سے بدتر ہوتے جارہے ہیں اور ملک کی باگ ڈور حکمرانوں کے ہاتھ سے نکلتی ہوئی نظر آرہی ہے۔ جمعیت علماءپاکستان کے صدر ڈاکٹر صاحبزادہ ابوالخیر محمد زبیرنے کہا کہ کہ حکومت طالبان کا معاملہ ہویا حامد میر پر قاتلانہ حملے کا سنگین مسلہ ہو کبھی سیاسی قیادت ،میڈیا اور قانون نافذ کرنے والے اداروں کو ایک صفحے پر نہیں لاسکی، حامد میر کے سانحہ پر وزیر اطلاعات میڈیا کے حق میں بیان دے رہے تھے جبکہ وزیرداخلہ اس کے خلاف بیان دے رہے تھے ،وزیر اعظم حامد میر کی عیادت کر کے جیو سے ہمدردی کا اظہار کررہے تھے دوسری جانب وزیر دفاع جیوکو ملک دشمن قرار دے کر پیمرا سے ان کے خلاف کارروائی کے لیے نوٹس بھجوارہے تھے ،حکمرانوں کی اس منافقانہ پالیسی نے ملک کو ایک سخت ترین بحران سے دوچار کردیا ہے اور 1999ءجیسی صورت حال دوبارہ پیدا کردی ہے،انھوں نے کہا کہ اب بھی وقت ہے کہ حکمراں ہوش کے ناخن لیں اور تمام اہم معاملات میں فوج کو اعتماد میں لے کر بالخصوص حامد میر کے سانحہ کے سلسلے میں میڈیا اور عسکری اداروں کے درمیان جو تلخیاں پیدا ہوگئی ہیں اس کو فوری ختم کرنے کی کوشش کریں اس تنازعہ سے پوری دنیا میںملک کا وقار خاک میں مل رہا ہے جس کا حکمرانوں کو کوئی احساس نہیں ہے ۔

حیدرآباد: ڈپٹی کمشنر مٹیاری فیاض حسین عباسی نے کہا ہے کہ حکومت سندھ تعلیم کے نظام کو بہتر بنانے کے لیے ترجیحی بنیادوں پر کان کر رہی ہے۔ ڈپٹی کمشنر مٹیاری فیاض حسین عباسی نے والدین پر زور دیا ہے کہ وہ اپنے بچوں کی تعلیم و تربیت پر خاص توجہ دیں اور انھیںبہتر تعلیم کی فراہمی میں کسی بھی قسم کا سمجھوتہ نہ کریں ۔ انھوں نے کہا کہ نوجوانوں کو بہتر تعلیمی ماحول فراہم کر کے ہم حقیقی ترقی حصول ممکن بنا سکتے ہیں ۔ انھوں نے کہا کہ موجودہ حکومت سندھ تعلیم کے نظام کو بہتر بنانے کے لیے ترجیحی بنیادوں پر کام کر رہی ہے ۔ وہ گذشتہ روز سعید آباد میں شہید بینظیر بھٹو لائبریری کی تزئین و آرائش اسکیم کے مکمل ہونے پر لائبریری کے افتتاح کرنے کے لیے منعقدہ تقریب سے خطاب کر رہے تھے۔ ڈی سی مٹیاری نے کہا کہ کتاب انسان کا بہترین دوست ہے اور کہا کہ نوجوانوں میں الیکٹرانک میڈیا اور سوشل میڈیا کی وجہ سے مطالعے کے رجحان میں کمی آئی ہے جس سے کچھ معاشرتی برائیوں نے بھی جنم لیا ہے ۔ انھوں نے کہا کہ نوجوانوں میں مطالعے کے رجحان کو بڑھانے کے لیے ہمیں زیادہ سے زیادہ لائبریریاں قائم کرنی ہوں گی اور اس کے لیے ضلع کے ہر فرد کو اپنا کردار ادا کرنا ہوگا۔ انھوں نے کہا کہ شہید بینظیر بھٹو لائبریری 2009سے غیر فعال تھی جسے ضلعی انتظامیہ مٹیاری کی جانب سے سنجیدہ اور فوری اقدامات کر کے دو ہفتوں میں تزئین و آرائش کا کام مکمل کر کے اسے فعال بنایا ہے۔ انھوں نے لوگوں کو اپیل کی کہ وہ لائبریری کی نگرانی کریں تاکہ ان لائبریریز سے زیادہ سے زیادہ لوگ مستفید ہو سکیں۔ اس موقع پر انھوں نے ضلعی انتظامیہ کی جانب سے 45ہزار روپے کی نایاب کتب بھی لائبریری کے حوالے کیں جبکہ سروری جماعت کے رہنما مصری کاکا کی جانب سے لائبریری کے لیے کتب خرید کرنے کے لیے دس ہزار روپے دینے کا اعلان کیا۔ اس موقع پر شوکت علی انڑ ، رئیس عمران راہو اور دیگر بھی موجود تھے۔

حیدرآباد: حیدرآباد چیمبر آف کامرس اینڈ انڈسٹری کے صدر گوہراﷲ نے ضلعی انتظامیہ سے اپیل کی ہے کہ شہریوں اور تاجربرادری کے مفاد میںلطیف آباد ٹویوٹا وین اسٹینڈ فو ری طو رپر بحال کیا جائے ۔گوہراللہ کا کہنا تھا کہ قریبی وین اسٹینڈ بند ہونے سے مسافروں اور ٹرانسپو رٹر وں میں شدید بے چینی پائی جاتی ہے ۔رات کے اوقات میں فیملی کے ساتھ سفر میں کوہسار ، لطیف آباداور قاسم آباد کے مکینوں کو آمد و رفت میں شدید مشکلات کا سامنا کرنا پڑتا ہے ، ٹرانسپو رٹروں کا موقف ہے کہ ضلعی انتطامیہ کی طرف سے بلدیہ بس ٹرمینل بند کرنے سے بہت سے ٹرانسپورٹر سخت پریشان ہیں ، لہذا ان ٹرانسپو رٹروںکو قرب و جوار میں بحال کیا جائے اور ترجیحی بنیا دوں پر ٹرانسپو رٹروں کو لطیف آباد ٹویوٹا وین اسٹینڈ سے گاڑیاں چلانے کی اجازت دی جائے ۔

حیدرآباد: وزارت پانی و بجلی کے احکامات پر حیسکو ریجن کے 14 اضلاع میں 3 لاکھ سے زائد نادہندہ نجی و سرکاری اداروں کے صارفین سے واجبات کی وصولی کو تیز کردیاگیا ہے ،اس سلسلے میں کارروائیوں کے دوران 10ہزار 725 سرکاری و نجی نادہندہ صارفین کے بجلی کے کنکشن منقطع کردیئے گئے ہیں۔جبکہ 95کروڈ روپوں سے زائد کی وصولی کی گئی ہے ۔اوربجلی چوروں کے خلاف FIR درج کرنے کے ساتھ گرفتاریاں بھی عمل میں لائی جارہی ہیں۔ واضح رہے کہ ہائی کورٹ حکم پر HDA ،واساکے صرف واٹر سپلائی اور ڈرینیج کے بجلی کے کنکشن بحال کردیئے ہیں۔ اور 39 غیرقانونی کنکشن منقطع کیئے گئے ہیں۔ جن فیڈوروں میں واجبات کی وصولی 100 یا 80 فیصد ہوگی ان کی بجلی کی بندش کا دورانیہ کم کیا جائے گا۔تفصیلات کے مطابق حیسکو انتظامیہ کی جانب سے حیسکو ریجن کے 14 اضلاع میں نادہندگان سے واجبات کی 100 فیصد وصولی مشن کو تیز کردیا گیا ہے ۔اس سلسلے میں کارروائیوں کے دوران میں 10ہزار 725 سرکاری و نجی صارفین کی بجلی منقطع کردی گئی ہے جن کی تفصیلات درج ذیل ہیں۔ آپریشن سرکل I-، کے سرکاری نادہندہ اداروں پر 15 ارب 41 کروڑ 49 لاکھ ، اور نجی نادہندہ صارفین پر 6 ارب 77 کروڑ 15 لاکھ کے واجبات ہیں جس پر کاروائی کرتے ہوئے2479 سرکاری اداروں اور 1871 نجی نادہندہ صارفین کے بجلی کے کنکشن منقطع کیئے گئے ہیں۔ جبکہ آپریشن سرکل II-، کے سرکاری نادہندہ اداروں پر 1ارب 57کروڑ 79 لاکھ ، اور نجی نادہندہ صارفین پر 1 ارب 92کروڑ ایک لاکھ کے واجبات ہیں جس پر کاروائی کرتے ہوئے 1625سرکاری اداروں اور 1400نجی نادہندہ صارفین کے بجلی کے کنکشن منقطع کیئے گئے ہیں۔ جبکہ آپریشن سرکل نوابشاہ کے سرکاری نادہندہ اداروں پر 99 کروڑ 8 لاکھ ، اور نجی نادہندہ صارفین پر48کروڑ 98 لاکھ کے واجبات ہیں جس پر کاروائی کرتے ہوئے 1390سرکاری اداروں اور 1960نجی نادہندہ صارفین کے بجلی کے کنکشن منقطع کیئے گئے ہیں۔ اس کے علاوہ 58 خصوصی ریکوری ٹیمیں ڈائریکٹر سرویلینس اینڈ انویسٹی گیشن ظہور احمد شیخ کی سربراھی میں کاروائیاں کررہے ہیں ، واضح رہے کہ ہائی کورٹ حیدرآباد کے حکم پر حیسکو انتظامیہ کی جانب سے HDA ،واسا کے صرف واٹر سپلائی اور ڈرینج کے بجلی کنکشن بحال ہیں۔ HDA ،واسا کے 202 بجلی کے منظور شدہ کنکشن پر حیسکو کے 7.9 بلین کے واجبات جولائی 2010سے اب تک کے ہیں ، اس کے علاوہ HDA،واسا کے 39 غیر قانونی کنکشن منقطع کردیئے گئے ہیں۔ مزید برآں یہ کہ ایسے تمام 11 کے وی فیڈر جن پر نادہندہ صارفین پر80% فیصد واجبات کی رقم یا اس سے زائد ہے ، وہاں پر بجلی کی بندش کا دورانیہ بل ترتیب 12 ۔ 16۔ 18 اور 20 گھنٹے کیا جائے گا، اور جن فیڈروں پر واجبات کی وصولی 100 فیصد یا 80 فیصد ہوگی ، ان فیڈروں کے علاقوں میں بجلی کی بندش کا دورانیہ کم کیاجائے گا۔

کراچی: صوبائی وزیر سیاحت وثقافت شرمیلا فاروقی نے ارم اشفاق کی بنائے ہوئے فن پاروں کی نمائش کاافتتاح کردیا۔ کراچی نیشنل میوزیم میںمنعقدہ افتتاحی تقریب کے موقع پرصوبائی وزیر کا کہنا تھا کہ ارم اشفاق کی پینٹنگز قابل تعریف ہےں،انھوں نے کہا کہ ہمیں اس طرح کی کاوشوں کو ضرور سراہنا چاہیئے ،اس سے فنکاروں کے حوصلے بلند ہوںگے اور بین الاقوامی سطح پر پاکستان کا نام روشن کرنے میںمدد ملے گی۔اس موقع پر مصورہ ارم اشفاق کا کہنا تھا کہ کراچی میں نمائش کا میرا یہ پہلا موقع ہے اور عوام کی نمائش میںبھر پورشرکت سے میرے حوصلے بلند ہوئے ہیں۔ارم اشفاق کامزید کہنا تھا کہ مصوری کاشوق ورثے میں ملا ہے ،میں نے انجینئرنگ کی تعلیم حاصل کی لیکن مصوری کے شوق نے مجھے پیشہ ور مصور بنا دیا،فنکارہ نے سندھ حکومت کی طرف سے نمائش کے انعقاد پرخوشی کا اظہار کرتے ہوئے کہا کہ میں اس سے پہلے پاکستان کے مختلف شہروں میں چھ سولو نمائش کر چکی ہوں لیکن کراچی کے اندر نمائش کے انعقاد پر میں زیادہ خوشی محسوس کررہی ہوں۔نمائش 30اپریل تک جاری رہے گی۔