شہدادپور: شہداد پو ر میں مسلح افراد کی جانب سے موٹر سائیکل چھیننے کی کوشش، مزاحمت پرفائرنگ سے دو افراد شدید زخمی ہو گئے ۔ تفصیلا ت کے مطابق شہداد پور کے گنجان آباد علاقے محمدی ٹاﺅن میں تین نامعلوم مسلح رہزنوں نے علاقے کے زمیندار گل حسن کیریو اورسارنگ خاص خیلی سے گن پوائنٹ پر ہنڈا موٹر سائیکل چھیننے کی کوشش کی جس پر انھوں نے مزحمت کی ، مزاحمت پر مسلح افرادنے ان پر فائر کھول دیا جس کے نتیجے میں دونوںافراد شدید زخمی ہوگئے ۔ دونوںزخمیوں کوشہدادپور اسپتال منتقل کر دیا گیا جہاں ان کو طبی امداد دی جا رہی ہے۔

لاڑکانہ: لاڑکانہ پولیس کی جرائم پیشہ افراد کے خلاف کارروائی ،مختلف علا قوں سے مختلف مقدمات میں مطلوب 14روپوش اشتہاری ملزمان کو اسلحہ سمیت گرفتار کیا گیا۔تفصیلات کے مطابق حیدری تھانہ کی پولیس نے روپوش ملزمان عبدالجبار جتوئی ،غلام عباس ڈہانی،مریدعاربانی،مارکیٹ تھانہ پولیس اشتھاری ملزم شعیب جتوئی ،عاشق لغاری،اظہر آگانی،عبداللطیف کھیڑو،اختیار ببلو کورائی،قلندر بخش بروہی،شمشیر چانڈیو،رابیل کھکھرانی،مولا بخش بگھیو،رحیم کاندھڑو کو گرفتار کر لیا اور ان کے قبضے سے تین عدد پسٹل اور ایک بندوق برآمد کرلی ۔ایس ایس پی خالد مصطفی کورائی نے کہا ہے کہ جرائم پیشہ افراد کی پشت پناہی کرنے والوں کو ہر صورت میں قانون کی گرفت میں لایا جائے گا۔

لاڑکانہ: سندھ کے سینیئرصوبائی وزیر نثار احمد کھوڑو نے کہا ہے کہ سفارشی کلچر کا خاتمہ کر کے میرٹ کی بنیاد پر اساتذہ کی بھرتی ہوگی،پہلے مرحلے میں ایک ہزار اساتذہ بھرتی کئے جائیںگے۔یہ بات انھوں نے پائلٹ ہائر سیکنڈری اسکول لاڑکانہ میں اساتذہ کی این ٹی ایس ٹیسٹ پاس کرنے والے ۵۴ ایچ ایس ٹی کامیاب امیدواروں میں آفر آرڈر تقسیم کرنے کی تقریب سے خطاب کرتے ہوئے کی، انھوںنے مزید کہا کہ سندہ میں جے ایس ٹی کے سات ہزار اساتذ ہ جبکہ پی ایس ٹی کے بارہ ہزار اساتذہ بھرتی کئے جائےں گے، یہ سلسلہ ضلع بینظیرآباد سے شروع کیا گیا ہے،جو کہ شہید بینظیر بھٹو کے نام سے منسوب ہے۔انھوںنے ایچ ایس ٹی کے ۵۴ کامیاب امیدواروں کو مبارکباد دیتے ہوئے کہا کہ آپ لو گوں نے بہت محنت کی ہے۔اور میرٹ پہ پوزیشن حاصل کی ہے۔ انھوں نے اساتذہ کو ہدایت کی کہ تعلیم کے معیار کو ترجیحی بنیادوںپربڑھایا جائے۔اس موقع پر محکمہ تعلیم کے اسپیشل سیکریٹری پرویز احمد سیہڑ ڈائریکٹر اسکول،کمشنر لاڑکانہ ڈاکٹر سعید منگنیجواور دوسرے تعلیمی افسران اور پارٹی رہنما موجود تھے۔

شہدادپور: شہدادپور کے محلہ اسلام آباد میں سات سالہ بچہ چھت سے گر کر جاں بحق ہوگیا۔ گھر کی چھت پر پتنگ اڑاتے ہوئے سات سالہ فیصل آرائیں گر کر جاں بحق ہو گیا ، بچی والدہ خبر سن بے ہوشی کے شدید دورے پڑنے لگے ۔

حیدر آباد: پاکستان پیپلز پارٹی ضلع حیدرآباد کے رہنماوؤں اور کارکنان کی جانب سے پاکستان پیپلز پارٹی کے سر پرست اعلیٰ بلاول بھٹو زرداری کی 25ویں سالگرہ کے موقع پر خوشی اور انکی قیادت پر بھرپور اعتماد کا اظہار کیا گیا۔ پی پی پی حیدرآباد کے جنرل سیکریٹری فیاض حسین شاہ کے رہائش گاہ پر منعقدہ سالگرہ کی تقریب منعقد ہوئی ۔ اس موقع پر تقریب میں خطاب کرتے ہوئے حیدرآباد کے ضلعی صدر زاہد علی بھرگڑی نے کہا کہ بلاول بھٹو زرداری ایک بہادر جرائت مند رہنما ثابت ہونگے اور رب پاک سے دعا ہے کہ اللہ تعالیٰ انہیںلمبی عمر عطا کرے تاکہ وہ ملک اور قوم کی زیادہ سے زیادہ خدمت کر سکے ۔ انھوں نے کہا کہ یہ ان کا پختہ یقین ہے کہ بلاول بھٹو زرداری اپنے والدین کی طرح ملک اور قوم کی غریب عوام کی خدمت کے لئے اپنا بھرپور کردار ادا کریں گے۔ قبل ازیں تقریب سے خطاب کرتے ہوئے امان اللہ سیال ، آفتاب احمد خانزادہ ، جبار خان ،علی محمد سہتو ، رجب خاصخیلی ، قاضی بابو عبد اللہ اور دیگر نے کہا کہ قائد عوام شہید ذوالفقار علی بھٹو اور محترمہ شہید بینظیر بھٹو کی رہنمائی میں جس طرح غریب عوام کی خدمت کی گئی ہے اسی طرح سے بلاول بھٹو زرداری کی قیادت میں بھی اس عمل کو جاری رکھا جائے گا، تقریب میں 25پاوؤنڈ کا کیک بھی کاٹا گیا۔

سہون: سیہون میں حیسکو کی جانب سے سرکاری محکموں ،ٹاﺅن کمیٹی سیہون شریف کے دفتر اور واٹر سپلائی کا محکمہ سمیت پندرہ سرکاری اداروں کی بجلی واجبات کی عدم ادائیگی پر کاٹ دی گئی ۔ تفصیلات کے مطابق ایکسن حیسکو واپڈا کوٹری کے حکم پر ایس ڈی او واپڈا سیہون شریف ایم ابراہیم کیریو نے ٹاﺅن کمیٹی سیہون شریف سمیت پندرہ دیگر سرکاری اداروں کی بجلی کے کنکشن کاٹ دیئے جن پر لاکھوں کے بقایاجات بتائے جاتے ہیں،دوسری جانب ٹاﺅن کمیٹی سیہون شریف کے تمام بجلی کنکشن کاٹ دئے گئے ہیں جن سے واٹر سپلائی، اسٹریٹ لائیٹ اور دیگر شہری ادارے متاثر ہوگئے ہیں۔ واٹر سپلائی کا نظام معطل ہوجانے سے شہریوں کو پینے کے پانی کی قلت کا سامنا کر نا پڑ رہاہے ،اس سلسلے میں ایڈمنسٹریٹر ٹاﺅن کمیٹی سے رابطہ کیاگیا تو انھوں نے بتایا کہ سندھ حکومت کی جانب سے صرف تنخواہوں کی مد میں ادائیگی کی اجازت دی ہے جس کی وجہ سے دیگر کاموں کو چلانے میں بھی دشواریاں پیش آرہی ہیں۔