لاہور:پاکستان کرکٹ بورڈ کے ڈومیسٹک آپریشن چیف انتخاب عالم نے کہا ہے کہ پی سی بی مشکوک بولنگ ایکشن جانچنے کے لیے آسٹریلین سوفٹ وئیر درآمد کرنے پر غور کررہا ہے۔آسٹریلین سوفٹ وئیر کے ذریعے بہ آسانی اس بات کا اندازہ لگایا جا سکے گا کہ بولر آئی سی سی کی جانب سے قابل قبول 15ڈگری تک کلائی موڑنے تک محدود ہے یا پھر وہ اس حد کو برقرار رکھنے سے قاصر ہے۔ان کا کہنا تھا کہ نیشنل کرکٹ اکیڈمی لاہور میں بائے مکینک لیب قائم کرنے کے ساتھ،22تیز ترین کیمریںاور اس سے متعلق تمام سوفٹ وئیر درآمد کرنے پر غور کررہے ہیں۔ان کا مزید کہنا تھا کہ مشکوک بولنگ دنیا بھر کا مسئلہ ہے،آئی سی سی نے غیر جانب دارانہ طور پر تحقیق کرتے ہوئے پاکستانی اسپن بولر سعید اجمل کو مشکوک بولنگ کے حامل قرار دیا تھا۔

ولنگٹن:نیوزی لینڈ کرکٹ ٹیم کے کپتان برینڈن میک کولم اپنے سابق ساتھی کھلاڑی کے خلاف میچ فکسنگ کے ثبوت عالت کو فراہم کرنے کے لیے پرعزم ہیں۔ برینڈن میک کولم کے وکیل گیرتھ گلاوے نے سابق کھلاڑی کا نام لیے بغیر کہا کہ ان کے خلاف ثبوت فراہم کردیے جائیں گے تاہم یقینی طور پر کہا جارہا ہے کہ وہ سابق کھلاڑی کرس کینز ہیں۔میک کولم کے حوالے سے حال ہی میں نیوزی لینڈ کے مقامی اخبار میں حقائق چھپی تھی تاہم انھیں روک دیا گیا تھا۔ میک کولم آئی سی سی کے اینٹی کرپشن یونٹ کے سامنے بھی پیش ہوئے تھے جس کی رپورٹ بھی میڈیا تک پہنچ گئی تھی۔جس کے بعد کرس کینز نے اعتراف کیا تھا کہ جس کھلاڑی کا نام نہیں دیا گیا ہے وہ خود ہیں لیکن انھوں نے فکسنگ کے الزامات کی سختی سے تردید کی تھی ۔میک کولم کے وکیل نے کہا کہ انھیں اخبار میں حقائق دینے سے روکنے کے باوجود وہ کھیل کی بہتری کے لیے ثبوت دینے کے لیے پرعزم ہیں۔انھوں نے کہا کہ میک کولم کرکٹ سے فکسنگ کے داغ کو دھونے کے لیے راست قدم اٹھانے کے لیے تیار ہیں۔

جوہانس برگ: آسٹریلیا کرکٹ ٹیم پاکستان کے خلاف سیریز میں2-0سے کامیابی حاصل کرکے ٹیسٹ رینکنگ میں جنوبی افریقا سے نمبر ون پوزیشن واپس لے سکتا ہے۔جنوبی افریقا نے رواں سال جولائی میںسری لنکا کوٹیسٹ سیریز میں 1-0سے شکست دے کر پہلی پوزیشن حاصل کی تھی۔ اگلے ماہ یو اے ای میں آسٹریلیا اور پاکستان کے درمیان 2ٹیسٹ میچوںپر مشتمل سیریز کھیلی جائے گی ،اس سیریز میں آسٹریلیا کو ٹیسٹ رینکنگ میں نمبر ون پوزیشن حاصل کرنے کے لیے 2-0سے کامیابی درکارہوگی ۔آئی سی سی ٹیسٹ رینکنگ میں جنوبی افریقا نمبر ون پر موجود ہے جبکہ دوسرے نمبر پر آسٹریلیا ،تیسرے پر انگلینڈ،چوتھے پر سری لنکا ،بھارت پانچویں،پاکستان چھٹے ،ساتویں نمبر پر نیوزی لینڈ،آٹھویں پر ویسٹ انڈیز،نوویں پر زمبابوئے جبکہ دسویں نمبر پر بنگلہ دیش موجود ہیں۔

زیورخ: فیفا نے فٹ بال کی تازہ رینکنگ جاری کردی ہے ، تازہ درجہ بندی میں عالمی چمپیئن سرفہرست جبکہ پاکستان ترقی کہوئی ہے۔فیفا کی جانب سے جاری کردہ تازہ درجہ بندی میں عالمی چمپیئن جرمنی حال ہی میں ارجنٹینا کے خلاف دوستانہ میچ میں شکست کے باوجود پہلے نمبر پر براجمان ہے،ارجنٹنیادوسرے ، کولمبیا اپنے آخری میچ میں برازیل کے شکست کے باوجود تیسرے نمبر پر آگیا ہے،نیدر لینڈ تیسرے ،بیلجیم چوتھے،برازیل ترقی پاکر پانچویں ،یوروگوائے ساتویں ،اسپین آٹھویں،فرانس نویں اور سوئٹزرلینڈ سرفہرست دس ٹیموں میں آخری نمبر پر ہیں۔ دیگر ٹیموں میں کوسٹا ریکا ،میکسیکو ،امریکا درجہ بندی میں بالترتیب15،16اور17ویں پوزیشن پر موجود ہیں۔ انگلینڈ 18ویں اور الجزائر20ویں نمبر پر ہیںجبکہ ایران کا نمبر ایشیائی ٹیموں میں44ویں نمبر پر ہے ۔ پاکستان کی ٹیم گیارہ درجے ترقی پاکر 175ویں نمبر پر موجود ہے جبکہ بھارت تنزلی کے بعد158ویں نمبر پر چلا گیا ہے۔

کراچی: کراچی انٹر سکول کر کٹ ٹورنامنٹ کی افتتاحی تقریب میں ٹیسٹ کرکٹر یونس خان نے شاہد آفریدی کی کپتانی میں ٹی 20 ورلڈ کپ جیتنے کی خواہش کا اظہار کر دیا۔ کراچی جم خانہ میں ہونے والی انٹر سکول کرکٹ ٹورنامنٹ کی افتتاحی تقریب میں یونس خان اور شاہد آفریدی نے بچوں کی حوصلہ افزائی کے لیے خصوصی شرکت کی۔ میڈیا سے بات کرتے ہوئے ٹیسٹ کرکٹر یونس خان کا کہنا تھا کہ پی سی بی کا آفریدی کو کپتان بنانے کا فیصلہ درست ہے، نھوںنے کہا کہ قومی ٹیم نے ان کی کپتانی میں ٹی 20 ورلڈ کپ جیتا تھا اور ان کی خواہش ہے کہ شاہد آفریدی بھی ٹرافی پاکستان کے نام کریں۔ یونس خان کا کہنا ہے کہ ٹیسٹ کرکٹ میں جاوید میانداد کے برابر رنز بنانا ان کے لیے اعزاز کی بات ہوگی۔ ان کا مزید کہنا تھا کہ آئی سی سی ورلڈ کپ ٹرافی پاکستان آنے سے پرانی یادیں تازہ ہوگئیں۔ انٹر سکول ٹورنامنٹ میں 32 ٹیمیں حصہ لے رہی ہیں۔ ایونٹ ایک ہفتہ تک جاری رہے گا۔ افتتاحی میچ سینٹ پال اور رینجرز سکول کے درمیان ہوگا۔