جیلوں میں مقید بچے بھی اب نرسنگ، الائیڈ ہیلتھ سائنسزاور ایم بی بی ایس میں داخلہ لے سکیں گے

اسلام آباد (پی پی آئی)وفاقی وزیرصحت عبد القادرپٹیل نے کہا ہے کہ سال 2023 سے پاکستان کی تمام جیلوں میں قید بچوں کو نرسنگ، الائیڈ ہلتھ سائنسز، اور ایم بی بی ایس میں ایڈمیشن اور تعلیم دی جائے گی۔پی پی آئی کے مطابق عبد القادرپٹیل کا کہنا تھا کہ تمام پبلک سیکٹرمیڈیکل یونیورسٹیز کو یہ لازم کیا جائے گا کہ کوئی بھی بچہ اگرجیل میں ڈاکٹر بھی بننا چاہے، تو یہ اس کا حق ہے۔اس کے علاوہ فیصلے سے متعلق پاکستان میڈیکل کمیشن کو بھی ہدایت جاری کردی ہے۔ان کا کہنا تھا کہ جیل میں موجود لائق اورذہین بچوں کو ڈاکٹر، نرسز، اور میڈیکل کے کسی بھی شعبے میں تعلیم حاصل کرنے کیلئے مواقع فراہم کئے جائیں گے۔پی پی آئی کے مطابق وفاقی وزیرصحت نے کہا کہ اس کا مقصد جیل میں قید تمام بچوں کومعاشرے میں ایک نمایاں مقام دلانا ہے۔