سیاسی عدم استحکام اور رجیم چینج پوری قوم پر بھاری پڑا ہے: مسرت جمشید

لاہور(پی پی آئی) ترجمان حکومت پنجاب مسرت جمشید چیمہ نے کہا ہے کہ پی ڈی ایم تجربے کا پروپیگنڈہ کر کے اقتدار میں آئے اور ان کا یہ تجربہ بھی ایکسپوز ہوگیا۔سماجی رابطے کی ویب سائٹ ٹوئٹر پر اپنے پیغام میں مسرت جمشید چیمہ نے کہا کہ سیاسی عدم استحکام اور رجیم چینج پوری قوم پر بھاری پڑا ہے، عالمی مارکیٹ میں پٹرول 40 فیصد تک سستا ہوچکا ہے، لیکن امپورٹڈ حکومت 5 فیصد فائدہ بھی عوام تک نہیں پہنچا رہی۔مسرت جمشید چیمہ نے سانحہ اے پی ایس پر اپنی ٹویٹ میں کہا کہ سانحہ ایے پی ایس ملکی تاریخ کا سیاہ ترین باب ہے، اس دن کے زخم آج بھی تازہ ہیں، اساتذہ اور بچوں کی قربانیوں کو کسی صورت نہیں بھلایا جا سکتا، پاکستانی قوم دہشت گردی کے خلاف متحد ہے اور کسی صورت ان قربانیوں کو رائیگاں نہیں جانے دے گی۔