توہین الیکشن کمیشن کیس میں عمران خان، فواد چودھری اور اسد عمر کو پیش ہونے کی آخری مہلت

اسلام آباد(پی پی آئی)الیکشن کمیشن نے توہین کیس میں عمران خان، فواد چودھری اور اسد عمر کو آخری موقع دیدیا،ممبراکرام اللہ خان نے کہاکہ اگلی سماعت پر پیش نہ ہوئے تو وارنٹ جاری کریں گے۔ذرا ئع کے مطابق عمران خان، اسد عمر اور فواد چودھری کے خلاف توہین الیکشن کمیشن کیس کی سماعت ہوئی،ممبر نثاردرانی کی زیرصدارت4 رکنی کمیشن نے سماعت کی، الیکشن کمیشن نے عمران خان، فواد چودھری اور اسد عمر کو آخری موقع دیدیا۔وکیل انور منصور نے کہاکہ آئندہ سماعت سے قبل شوکاز نوٹس کا جواب جمع کرا دوں گا،الیکشن کمیشن نے پہلی مرتبہ کسی کو توہین عدالت کا نوٹس جاری کیا،ممبر نثار درانی نے کہاکہ عمران خان، فوادچودھری کو پہلے بھی توہین عدالت کے نوٹسز جاری کئے جا چکے ہیں۔وکیل علی محمد بخاری نے کہاکہ وارنٹ جاری نہ کریں، پیشی کا نوٹس دے دیں،ممبراکرام اللہ خان نے کہاکہ اگلی سماعت پر پیش نہ ہوئے تو وارنٹ جاری کریں گے،الیکشن کمیشن نے فریقین کو 17 جنوری تک شوکاز نوٹسز کا جواب دینے کی ہدایت کردی،الیکشن کمیشن نے کیس کی مزید سماعت17 جنوری تک ملتوی کردی۔