کالعدم تحریکِ طالبان پاکستان کی مسلم لیگ ن اور پیپلز پارٹی کے خلاف کارروائی کی دھمکی، عوام کو پارٹی رہنماؤں سے دور رہنے کی ہدایت

اسلام آ باد(پی پی آ ئی) کالعدم تحریک طالبان پاکستان نے ایک بیان میں حکومتی اتحاد میں شامل جماعتوں پاکستان پیپلز پارٹی اور پاکستان مسلم لیگ ن کو متنبہ کیا ہے وہ ان جماعتوں کے خلاف ’ٹھوس اقدامات‘ کرنے کے بارے میں سوچ رہی ہے۔بی بی سی کے مطابق تنظیم نے ایک بیان میں کہا ہے کہ ’کافی عرصے سے تحریک طالبان پاکستان نے کسی سیاسی پارٹی کے خلاف اقدام نہیں کیا ہے،مگر بد قسمتی سے موجودہ حکومت کی قیادت پر معلوم نہیں امریکہ کا جادو کیسے چل پڑا کہ (وزیرِ خارجہ) بلاول بھٹو زرداری نے ٹی ٹی پی کے خلاف کھل کر اعلان جنگ کیا۔بیان میں وزیر اعظم شہباز شریف کے حوالے سے کہا گیا ہے کہ انھوں نے ’نہ جانے کس تصور میں امریکہ کی خوشنودی کی خاطر ٹی ٹی پی کے خلاف طبل جنگ بجا کر اپنی پوری پارٹی کو اس جنگ میں دھکیل دیا‘۔بیان میں کہا گیا ہے کہ ٹی ٹی پی برسر اقتدار مسلط کردہ ٹولوں کے خلاف ٹھوس اقدامات اٹھانے پر غور کر رہی ہے۔انہوں نے خبردار کیا کہ اگر یہ دوپارٹیاں اپنے مؤقف پر ڈٹی رہیں تو پھران کے سرکردہ لوگوں کے خلاف کاروائی کی جائے گی۔بیان میں عوام کو خبردار کیا گیا ہے کہ ’ایسے سرکردہ لوگوں کیقریب جانے سے اجتناب کریں۔