بادشاہ نے خان اور بلیک ایگل نے ستارہ کو شکست دی
کراچی (پی پی آئی)غفار خان اسپورٹس اینڈ ایونٹ آرگنائزر کی جانب سے ڈسٹرکٹ کورنگی میں ٹی 20کرکٹ ٹورنامنٹ کا آغاز ہو گیا۔ جس میں ڈسٹرکٹ کورنگی کی چھ ٹیموں نے حصہ لیا، بادشاہ الیون، شائننگ اسٹارز الیون، ستارہ حیدری الیون، خان الیون، بلیک ایگل الیون اور جے کے مارخور الیون شامل ہیں۔ پہلے دن دو میچوں کے فیصلے ہوگئے، بادشاہ الیون نے خان الیون کو 70رنز سے ہرا دیا، دوسرے میچ میں بلیک ایگل الیون نے ستارہ حیدری الیون کو دس رنز سے شکست دی،پی پی آئی کے مطابق افتتاحی تقریب سے خطاب کرتے ہوئے سماجی رہنما عرفان میو نے کہا کہ کھیل جسمانی نشوونما کے ساتھ ذہنی نشوونما بھی کرتا ہے۔ انہوں نے کہا کہ کھیل کے میدان آباد دیکھ کر خوشی ملتی ہے۔ صحت مند معاشرے کیلئے کھیلوں کا انعقاد ضروری ہے۔ کھیلوں کے مقابلے صحت مند ماحول فراہم کرتے ہیں۔پی پی آئی کے مطابق انہوں نے مزید کہا کہ اسپورٹس آرگنائزر اور اسپانسرز سے مل کرشہر کی ترقی کیلئے مل کر کام کرنے کی ضرورت ہے۔ کھیلوں کا فروغ اولین ترجیح ہے۔ کراچی کو اسپورٹس سٹی بنائیں گے، تمام اسپانسرز اور اسپورٹس آرگنائزر مل کر شہر کی ترقی میں اہم کردار ادا کریں گے۔ کھیلوں کے مقابلے نوجوانوں کی صلاحیتوں میں اضافہ کرتے ہیں۔ نوجوانوں کی حوصلہ افزائی کرتے رہیں گے۔