سعودی ولی عہد اور نوازشریف کے مابین ملاقات

اسلام آباد/جدہ(پی پی آ ئی) وفاقی وزیر اطلاعات مریم اورنگزیب نے کہا ہے کہ سعودی ولی عہد شہزادہ محمد بن سلمان اور نوازشریف کے مابین ملاقات میں سعودی پاک برادرانہ تعلقات کے مزید فروغ اور پاکستان کو درپیش مسائل کے حل پر بات کی۔سماجی رابطے کی ویب سائٹ ٹویٹر پر جاری بیان میں لیگی رہنما مریم اورنگزیب نے کہا کہ قائد محمد نواز شریف کی ولی عہد شہزادہ محمد بن سلمان سے ملاقات ہوئی۔ اس موقع پر مریم نواز بھی ملاقات میں موجود تھیں۔ نوازشریف نے سعودی قیادت کے لئے نیک تمناؤں کا اظہار کیا۔واضح رہے کہ سابق وزیراعظم نواز شریف ان دنوں سعودی عرب میں موجود ہیں جہاں سے وہ واپس لندن لوٹ جائیں گے جبکہ مریم نواز کا پاکستان آنے کا امکان ہے۔ سعودی ولی عہد شہزادہ محمد بن سلمان اور نوازشریف کے مابین ملاقات میں مریم نواز بھی موجود تھیں۔