اگرریفری پہلے ہاف میں ایک کا اور دوسرے میں دوسرے کا ساتھ دے تو احتجاج تو ہوگا

کوئٹہ(پی پی آئی) جمعیت علمائے اسلام کے رہنما حافظ حسین احمد نے کہا ہے کہ حالات کے ساتھ الفاظ کے لغویمعانی بھی تبدیل ہوتے نظر آرہے ہیں جس کو ”نیوٹرل“ کہا اور سمجھا جاتا تھا آج اس کو ”نیو ٹرن“ کے مفہوم سے موسوم کیا جارہا ہے وہ میڈیا سے ٹیلی فون پرگفتگو کررہے تھے۔پی پی آئی کے مطابق انہوں نے کہا کہ کل کچھ ادارے ”A“ کو اور آج وہی ”B“ کو سپورٹ کررہے ہیں اس لیے سیاسی بے چینی کے گہرے اور کالے بادل مسلسل چھائے ہوئے ہیں ہر ادارے اور سیاسی جماعت کو ”آئین“ کے آئینے میں اپنا کردار اور عمل کو ازخود دیکھنا ہوگا اور خود احتسابی کا یہ عمل ہی ہمارے مسائل و مشکلات کا حل ہے۔ اگر کھیل کھلانے والا ریفری کھیل کے شروع میں ایک ٹیم کا ساتھ دے اور دوسرے ہاف میں امپائر دوسرے ٹیم کا ساتھ دے تو نہ صرف دونوں ٹیمیں آواز اٹھائیں گی بلکہ تماشائی بھی اس پر بھرپور احتجاج کریں گے اور ہمارے ہاں تقریباً یہ انداز نظر آتا ہے۔