سانحہ یونان سے ہر پاکستانی کا دل دکھی ہے:سراج الحق

لاہور (پی پی آ ئی)امیر جماعت اسلامی سراج الحق نے کہا ہے کہ سانحہ یونان سے ہر پاکستانی کا دل دکھی ہے۔ حالات کی تنگی کا شکار سینکڑوں نوجوان بہتر مستقبل کی آس میں لاکھوں روپیہ خرچ کرکے گھروں سے نکلے مگر کھلے سمندر میں بے بسی کے عالم میں اپنی جان سے گئے، ان کے گھر کی امیدیں بھی ساتھ ڈوب گئیں۔اپنے ایک بیان میں می سراج الحق نے کہا ہے کہ پی ڈی ایم کی ناکام حکومت نے اپنی ظالمانہ اور بے حسی پر مبنی پالیسیوں نے ملک کو ناقابل رہائش بنا دیا ہے۔ اعلی تعلیم یافتہ ہوں یا مزدور، ملکی حالات سے مایوسی کی وجہ سے بہت بڑی تعداد میں ملک چھوڑنا چاہتے ہیں۔ انہوں نے کہا کہ حکمرانوں اور حکومتی پارٹیوں سے منسلک لوگوں کے اثاثے مسلسل بڑھ رہے ہیں، جبکہ عوام کی قسمت میں فقط مہنگائی و بیروزگاری اور غربت ہے۔ اس ظالمانہ نظام سے نجات ضروری ہے۔