جے شاہ مزید ایک سال کیلئے ایشین کرکٹ کونسل کے صدر بن گئے

کراچی(پی پی آئی) جے شاہ مزید ایک سال کے لیے ایشین کرکٹ کونسل کی قیادت کریں گے جبکہ پاکستان کرکٹ بورڈ اگلے سال ایشین کرکٹ کونسل کی سربراہی کرے گا۔ ذرائع کے مطابق ایشین کرکٹ کونسل کی چیئرمین شپ اس کے ارکان کے درمیان معمول کی بنیاد پر گھومتی ہے۔ بنگلہ دیش کے بعد سری لنکا کرکٹ بورڈ کی باری تھی لیکن گزشتہ سال سری لنکن بورڈ کی رضامندی سے جے شاہ کی مدت ملازمت میں ایک سال کی توسیع کر دی گئی۔اب ایک بار پھر سالانہ جنرل کونسل اجلاس میں سری لنکا نے اپنی باری کو مزید ایک سال کے لیے قربان کرتے ہوئے جے شاہ کی مدت ملازمت میں توسیع کی درخواست کی جسے رکن ممالک نے قبول کر لیا۔ اس طرح بھارتی کرکٹ بورڈ کے سیکرٹری 2024میں بھی اپنی ذمہ داریاں نبھاتے رہیں گے۔ پی پی آئی کے مطابق2025میں پاکستان کرکٹ بورڈ کے سربراہ کا عہدہ سنبھالیں گے۔ ایشیا کپ کا ایجنڈا اس میٹنگ کا حصہ نہیں تھا اس لیے اس کے میزبان کے لیے اس پر کوئی باضابطہ بات چیت نہیں ہوئی۔اجلاس میں پاکستان کی نمائندگی قائم مقام چیئرمین اور الیکشن کمشنر شاہ خاور کے ساتھ چیف آپریٹنگ آفیسر سلمان نصیر نے کی۔