ایچی سن کالج کے پرنسپل مائیکل اے تھامسن کا استعفیٰ منظور

لاہور(پی پی آئی)ایچی سن کالج کے پرنسپل مائیکل اے تھامسن کا استعفیٰ منظور ہوگیا اور ان کی جگہ آمنہ کامران کو قائم مقام پرنسپل کا چارج دے دیا گیا ہے۔ ایچی سن کالج کے بورڈ آف گورنرز نے اجلاس میں مائیکل اے تھامسن کا استعفی منظور کیا، گورنر پنجاب بلیغ الرحمن نے اپنے فیصلے سے متعلق بورڈ ممبران کو آگاہ کیا۔پی پی آئی کے مطابق اس موقع پر بورڈ ممبران نے تحفظات کا اظہار کرتے ہوئے کہا کہ میرٹ، شفافیت کو ہر صورت مد نظر رکھنا ہوگا۔واضح رہے کہ آمنہ کامران اس وقت سینئر ہیڈ مسٹریس کے طور پرکام کررہی ہیں۔یاد رہے کہ مائیکل تھامسن نے چند روز قبل ایچیسن کالج کی فیس معافی کی پالیسی میں تبدیلیوں کے حوالے سے گورنر ہاؤس سے اختلاف کے باعث اپنے عہدے سے استعفیٰ دے دیا تھا۔انہوں نے اس سے قبل سینیٹر اور وفاقی وزیر احد چیمہ کی اہلیہ کی جانب سے جمع کرائی گئی فیس معافی کی درخواست کو قبول کرنے سے انکار کر دیا تھا۔

Latest from Blog