اسلام آباد (پی پی آئی) ہائر ایجوکیشن کمیشن پاکستان (ایچ ای سی) / ایجوکیشن ٹیسٹنگ کونسل (ای ٹی سی) نے انڈر گریجویٹ اسٹڈیز ایڈ ایڈمیشن ٹیسٹ (یُوسیٹ) کو یونیورسٹیوں میں طلباء کے داخلوں کے لیے ایک معیاری آلہء کارکے طور پر متعارف کرایا ہے۔ انڈرگریجویٹ اسٹڈیز ایڈ ایڈمیشن ٹیسٹ (یُوسیٹ) تعلیمی قابلیت کا جائزہ لے کر داخلہ کے عمل میں معیار کو یقینی بنانے کے لیے ڈیزائن کیا گیا ہے۔یہ بات علم میں آئی ہے کہ انڈر گریجویٹ اسٹڈیز کے حوالے سے غلط معلومات گردش کر رہی ہیں۔ یہ واضح کیا جاتا ہے کہ ایچ ای سی یونیورسٹیوں کو انڈر گریجویٹ اسٹڈیز ایڈ ایڈمیشن ٹیسٹ (یُوسیٹ) کی سفارش کرتا ہے، لیکن اداروں کے لیے یُوسیٹ اسکورز کو قبول کرنا لازمی نہیں ہے۔ ہر یونیورسٹی یہ فیصلہ کرنے کی خود مختاری کو برقرار رکھتی ہے کہ آیا یُوسیٹ کو اپنانا ہے یا اپنا داخلہ ٹیسٹ کروانا ہے۔
ایچ ای سی یونیورسٹیوں کی حوصلہ افزائی کرتا ہے کہ وہ انڈرگریجویٹ اسٹڈیز ایڈ ایڈمیشن ٹیسٹ (یُوسیٹ) کو داخلوں کے لیے ایک قابل قدر آپشن سمجھیں۔ تاہم یہ فیصلہ مکمل طور پر ہر یونیورسٹی پر منحصر ہے۔ تمام اسٹیک ہولڈرز سے گزارش کی جاتی ہے کہ وہ اس وضاحت کو سمجھیں تاکہ پاکستان بھر میں یونیورسٹیوں کے داخلوں میں انڈرگریجویٹ اسٹڈیز ایڈ ایڈمیشن ٹیسٹ کے اطلاق کے بارے میں کسی غلط فہمی سے بچا جا سکے۔ مزید معلومات اور اپ ڈیٹس کے لیے براہ کرم ایچ ای سی کی ویب سائٹ دیکھیں یا ایچ ای سی ای ٹی سی کے دفتر سے براہ راست رابطہ کریں۔