کوہ پیمائی کا سیزن شروع، ہزاروں کوہ پیماؤں کو اجازت نامے جاری

گلگت/   بلتستان(پی پی آئی)کوہ پیمائی کا سیزن شروع ہوتے ہی سیکڑوں مقامی اور غیر ملکی کوہ پیماؤں نے K2 سمیت 8 ہزار میڑ والی دیگر چوٹیوں کو سر کرنے کے لیے گلگت بلتستان کا رخ کرلیا۔ایک رپورٹ کے مطابق گلگت بلتستان کے محکمہ سیاحت نے خطے میں چوٹیوں کو سر کرنے کے لیے غیر ملکی سیاحوں کو 1,700 سے زائد اجازت نامے جب کہ 8 ہزار 611 میٹر والی K2 کو سر کرنے کے لیے 175 اجازت نامے جاری کیے ہیں۔پی پی آئی کے مطابق بہت سے کوہ پیماؤں نے K2، نانگا پربت، براڈ چوٹی، گاشربرم- ون اور گاشربرم-ٹو چوٹیوں پر اپنے بیس کیمپ  بھی قائم کر لئے ہیں۔عالمی شہرت یافتہ ہائی ایلٹی ٹیوڈ کوہ پیما محمد علی سدپارہ کے بیٹے ساجد علی سدپارہ بھی بغیر آکسیجن کے K2 پر چڑھنے کی کوشش کے لیے K2 بیس پر پہنچ گئے ہیں۔ نیز کئی مہم جو گروپ، جن میں خواتین بھی شامل ہیں، K2 بیس کیمپ پہنچ چکی ہیں، کچھ کوہ پیماؤں نے اسکردو اور شگر کے اضلاع سے ٹریکنگ شروع کر دی ہے۔رپورٹ کے مطابق دو مہم جو ٹیمیں مکمل طور پر خواتین پر مشتمل ہیں۔ 8,611 میٹر بلند دنیا کی دوسری بلند ترین چوٹی K2 کو سر کرنے کی کوشش میں اسکردو جا رہی ہیں۔ ٹیموں میں سے ایک مشترکہ پاکستان-اٹلی مہم گروپ ہے جبکہ دوسری میں چھ پاکستانی خواتین شامل ہیں۔

Latest from Blog