ملک کے مختلف ایئرپورٹس پر طیاروں سے پرندے ٹکرانے کے واقعات میں اضافہ

کراچی(پی پی آئی) کراچی سمیت ملک کے مختلف ایئرپورٹس پر طیاروں سے پرندے ٹکرانے کے واقعات میں بتدریج اضافہ ہونے لگاہے۔پی آئی اے کی رپورٹ کے مطابق گزشتہ چھ ماہ کے دوران قومی ایئرلائن کے طیاروں سے پرندے ٹکرانے کے 38 واقعات رپورٹ ہوئے اور قومی ایئرلائن کو لاکھوں ڈالرز نقصان کا سامنا کرنا پڑا۔رپورٹ  کے مطابق سب سے زیادہ واقعات لاہور ایئرپورٹ پر  کل 14 اور کراچی ایئر پورٹ پر 8 طیاروں سے پرندے ٹکرانے کے واقعات رپورٹ ہوئے۔اسی طرح اسلام آباد ایئرپورٹ پر  7، ملتان ایئرپورٹ 4، سکھر، گلگت اور فیصل آباد ایئرپورٹ پر ایک، ایک پرندہ ٹکرانے کا واقعہ پیش آیا۔بیرون ملک بھی قومی ایئرلائن کی پروازوں سے پرندے ٹکرانے کے واقعات پیش آئے،جدہ اور دبئی ایئرپورٹ پر پی آئی اے کے طیاروں سے ایک،ایک واقعہ رپورٹ ہوا۔