کراچی میں نجی ہسپتال کے واش روم میں بچے کو جنم دیکرخاتون فرار

کراچی(پی پی آئی)کراچی کے ایک نجی ہسپتال کے واش روم میں خاتون بچے کو جنم دینے کے بعد اسے وہیں چھوڑ کر فرار ہو گئی۔ کراچی کے علاقے کھارادر میں واقع نجی ہسپتال کے واش روم سے نومولود ملا۔ہسپتال انتظامیہ کے مطابق ایک خاتون مبینہ طور پر ڈرپ لگوانے اہلخانہ کے ساتھ ہسپتال آئی تھی، باتھ روم گئی جہاں اس نے بچے کو جنم دیا اور بغیر اطلاع دیے فرار ہو گئی۔ ہسپتال انتظامیہ کا کہنا ہے کہ عملے نے بچے کو واش روم سے نکال کر ابتدائی طبی امداد فراہم کی، بچے کو انتہائی نگہداشت کے وارڈ میں رکھا گیا ہے جہاں اس کی جان بچانے کی کوشش کی جا رہی ہے۔ پی پی آئی کے مطابق  ہسپتال  انتظامیہ نے خاتون کی تلاش کے لیے کھارادر پولیس کو اطلاع دے دی  ہے اور اس حوالے سے سی سی ٹی وی فوٹیجز بھی دیکھی جا رہی ہیں۔