میں بچیوں کوآکسفورڈ بھیج رہا ہوں یہ خودکش بمبار بنا رہے ہیں:وزیراعلیٰ بلوچستان

کوئٹہ(پی پی آئی)وزیراعلیٰ بلوچستان سرفرازبگٹی نے شہید ملازمین کے بچوں کی کفالت کا اعلان کردیا۔کوئٹہ میں سرفرازبگٹی کا تقریب سے خطاب کرتے ہوئے کہنا تھا کہ نوجوانوں کواعلیٰ تعلیم کے مواقع فراہم کر رہے ہیں، ذہین طلبہ کی حوصلہ افزائی کیلئے سکالرشپ بھی دیئے جا رہے ہیں۔حکومت بلوچستان کے ترجمان کے مطابق انہوں نے کہا کہ بچوں کوتعلیم کی فراہمی پرخصوصی توجہ دی جارہی ہے،ہم نے اقتدار میں آتے ہی بے نظیر سکالر شپ کا آغاز کیا، ہم نے 2000سے اب تک شہید ہونے والے افراد کے بچوں کی کفالت کا فیصلہ کیا ہے۔سرفراز بگٹی کا کہنا تھا کہ شہدا کے بچوں کی کفالت حکومت بلوچستان کرے گی، میں بلوچستان کی بچیوں کوآکسفورڈ بھیج رہا ہوں یہ خودکش بمبار بنا رہے ہیں۔انہوں نے مزید کہا کہ بلوچستان کا ایک مسئلہ کرپشن ہے، میں نے عہدہ سنبھالتے ہی تعلیم اور میرٹ پر ترجیح دی۔