حکومت نے اسلام آباد کی صورتحال کو خوش اسلوبی سے سنبھالا،دانیال چوہدری

 اسلام آباد(پی پی آئی)پارلیمانی سیکرٹری برائے اطلاعات و نشریات دانیال چوہدری نے کہا ہے کہ حکومت نے اسلام آباد کی صورتحال کو خوش اسلوبی سے سنبھالا ہے۔آج اسلام آباد میں ایک نیوز کانفرنس سے خطاب کرتے ہوئے انہوں نے کہا کہ مظاہرین کے خلاف طاقت یا ہتھیاروں کا استعمال نہیں ہوا۔انہوں نے کہا کہ حکومتی کارروائی سے مظاہرین کی کوئی ہلاکت نہیں ہوئی، اس حوالے سے پی ٹی آئی کے پروپیگنڈے پر افسوس ہے۔ انہوں نے کہا کہ حکومت نے ان لوگوں کے عزائم کو ناکام بنانے کے لیے صبر و تحمل کا مظاہرہ کیا جو لاشوں پر سیاست کرنا چاہتے تھے۔انہوں نے کہا کہ مختلف علاقوں سے نو سو مظاہرین کو گرفتار کیا گیا جن میں انتہائی مطلوب مجرم اور 37 افغان شہری شامل تھے جنہیں انتشار پھیلانے کے لیے لایا گیا تھا۔ انہوں نے کہا کہ ان کا ایجنڈا اقتصادی محاذ پر ملک کو پٹڑی سے اتارنا اور بیرونی سرمایہ کاری کو سبوتاڑ کرنا ہے۔