میٹروپولیٹن فٹ بال کپ، لیاری، بلدیہ اور ملیر ٹاؤنزکی ٹیمیں سیمی فائنل میں

کراچی(پی پی آئی)بلدیہ عظمیٰ کراچی کے محکمہ کلچر اینڈ اسپورٹس کے زیر اہتمام میٹروپولیٹن فٹ بال کپ 2024 کے سلسلے میں پیر کے روز کھیلے گئے تین کوارٹر فائنلز میں لیاری ٹاؤن، بلدیہ ٹاؤن اور ملیر ٹاؤن کی ٹیمیں جیت کر سیمی فائنل میں پہنچ گئیں جبکہ کے ایم سی کی ٹیم پہلے ہی ماڑی پور ٹاؤن کو ہرا کر سیمی فائنل میں پہنچ چکی ہے، دیگر تین کوارٹر فائنل میں شاہ فیصل ٹاؤن نے بلدیہ ٹاؤن کو کے ایم سی فٹ بال اسٹیڈیم میں 3 کے مقابلے میں 4 گول سے شکست دی جبکہ لیاری ٹاؤن نے گلشن ٹاؤن کو ککری فٹ بال گراؤنڈ لیاری میں صفر کے مقابلے میں 5 گول سے ہرایا، چوتھے کوارٹر فائنل میں آل برادرز فٹ بال اسٹیڈیم ملیر میں ملیر ٹاؤن نے گڈاپ ٹاؤن کو ایک کے مقابلے میں 2 گول سے ہرا کر سیمی فائنل کھیلنے کا اعزاز حاصل کیا، ٹورنامنٹ کے سیمی فائنل اور فائنل فلڈ لائٹس میں کھیلا جائے گا، پہلا سیمی فائنل بدھ 4 دسمبر کو ککری گراؤنڈ لیاری ٹاؤن اور بلدیہ ٹاؤن کے درمیان کھیلا جائے گا جبکہ جمعرات 5 دسمبر کو دوسرے سیمی فائنل آل برادرز فٹ بال اسٹیڈیم ملیر میں کے ایم سی اور ملیر ٹاؤن کی ٹیمیں مد مقابل ہوں گی، ٹورنامنٹ کا فائنل 7 دسمبر کو ککری گراؤنڈ لیاری میں کھیلا جائے گا، فائنل جیتنے والی ٹیم کو ٹرافی سمیت 10 لاکھ روپے، دوسرے نمبر پر رہنے والی ٹیم کو 5 لاکھ روپے اور تیسرے نمبر پر آنے والی ٹیم کو ڈھائی لاکھ روپے نقد انعام دیا جائے گا، ٹورنامنٹ میں سپروائز کرنے کے لئے بین الاقوامی تنظیم فیفا سے منظور شدہ ریفری اور دیگر ٹیکنیکل عملے کی خدمات حاصل کی گئی ہیں جبکہ سابق فٹ بالرز اور ماہرین کی مشاورت کو بھی یقینی بنایا گیا ہے تاکہ بلدیہ عظمیٰ کراچی کے تحت شہر میں منعقد ہونے والے اس پہلے میٹروپولیٹن کپ فٹ بال ٹورنامنٹ کو ہر اعتبار سے معیار کے مطابق بنایا جائے اور فٹ بال کے شائقین کو بہترین کھیل دیکھنے کو ملے۔