سویا بین، کینولا اور سورج مکھی جیسے متبادل خوردنی تیل پر ڈیوٹیز کم کی جائیں: بناسپتی مینوفیکچررز

کراچی (پی پی آئی) پاکستان بناسپتی مینوفیکچررز ایسوسی ایشن (پی وی ایم اے) کے چیئرمین شیخ عمر ریحان نے حکومت سے خوردنی تیل کی سپلائی چین میں موجود چیلنجز سے نمٹنے کے لیے فوری اقدامات کرنے اور سویا بین، کینولا اور سورج مکھی کے تیل جیسے متبادل خوردنی تیل پر ڈیوٹیز کم کرنے کی تجویز دی ہے۔ اس اقدام کا مقصد پاکستان کی پام آئل پر حد سے زیادہ انحصار کم کرنا اور درآمدات کو متنوع بنانا ہے، جو ملک کے ویجیٹیبل آئل کی کھپت کا بڑا حصہ ہے۔ شیخ عمر ریحان نے انڈونیشیا کی بائیو ڈیزل پالیسی کے باعث پیدا ہونے والی عالمی پام آئل کی قلت پر تشویش کا اظہار کیا۔ انہوں نے کہا کہ انڈونیشیا، جو پاکستان کی پام آئل کی درآمدات کا 90 فیصد فراہم کرتا ہے، جنوری 2025 تک پام آئل کو بائیو ڈیزل میں 40 فیصد تک شامل کرنے اور جنوری 2026 تک 50 فیصد تک بڑھانے کا ارادہ رکھتا ہے۔ اس تبدیلی کے ساتھ ماضی میں انڈونیشیا کی جانب سے قیمتوں میں اضافہ،  برآمدات پر پابندی جیسے اقدامات نے پاکستان کی سپلائی چین کو شدید متاثر کیا ہے۔  چیئرمین پی وی ایم اے نے کہا کہ پاکستان، جو دنیا میں پام آئل کا تیسرا سب سے بڑا درآمد کنندہ ہے، سالانہ 3.5 ملین ٹن پام آئل درآمد کرتا ہے اور ماضی میں اس طرح کی پابندیوں کے دوران سنگین مسائل کا سامنا کر چکا ہے۔  شیخ عمر ریحان نے حکومت سے درخواست کی کہ پاکستان اور انڈونیشیا کے ترجیحی تجارتی معاہدے (پی ٹی اے) کے تحت مستقل سپلائی کے معاہدے کو یقینی بنایا جائے۔ انہوں نے تھائی لینڈ کے ساتھ بھی مذاکرات شروع کرنے کی تجویز دی، جو کہ پام آئل کا ایک ابھرتا ہوا پروڈیوسر ہے، جبکہ ملائیشیا کے ساتھ آزاد تجارتی معاہدے (ایف ٹی اے) کے مواقع سے زیادہ سے زیادہ فائدہ اٹھانے پر زور دیا۔  مزید برآں، شیخ عمر ریحان نے نشاندہی کی کہ عالمی سطح پر اس وقت سویا بین اور کینولا کے تیل کی قیمتیں پام آئل سے کم ہیں، لیکن پاکستان میں ان کا فائدہ نہیں اٹھایا جا رہا کیونکہ ان پر عائد ریگولیٹری ڈیوٹیز پام آئل کے مقابلے میں زیادہ ہیں۔ انہوں نے ایک لچکدار ڈیوٹی ڈھانچے کی ضرورت پر زور دیا جو عالمی خوردنی تیل کی قیمتوں کے رجحان کے مطابق ہو، تاکہ پاکستان کم لاگت متبادل تیل سے فائدہ اٹھا سکے۔ انہوں نے کہا کہ ڈیوٹیز میں کمی نہ صرف خوردنی تیل کی مستحکم سپلائی کو یقینی بنائے گی بلکہ زرمبادلہ کے ذخائر اور مقامی قیمتوں پر دباؤ بھی کم کرے گی۔  پی وی ایم اے کے چیئرمین نے حکومت سے اپیل کی کہ وہ عالمی قیمتوں کے رجحان کا جائزہ لینے اور ڈیوٹیز کو مناسب طور پر منظم کرنے کے لیے صنعت کے شراکت داروں کے ساتھ تعاون کرے۔ انہوں نے خبردار کیا کہ فوری اقدامات نہ کیا گیا تو سپلائی چین پر دباؤ، مقامی قیمتوں میں اضافہ، اور پام آئل پر مزید انحصار جیسے مسائل پیدا ہو سکتے ہیں۔