سٹیزنز فاؤنڈیشن کے تحت کراچی گالف کلب، کارساز میں 21 واں سالانہ گولف ٹورنامنٹ منعقد

کراچی (پی پی آئی)سٹیزنز فاؤنڈیشن نے کراچی گالف کلب، کارساز میں 21 ویں سالانہ گولف ٹورنامنٹ کا انعقاد کیا۔ اس سال کا ٹورنامنٹ صرف ایک دلچسپ کھیل کا ایونٹ نہیں تھا بلکہ یہ شرکاء کے لیے پاکستان بھر کے کمزور طبقات کے بچوں کی زندگیوں پر دیرپا اثر ڈالنے کا ایک موقع تھا۔اس سال کے ٹورنامنٹ کا مرکز بچوں کو اسکول لانے کی اہم ضرورت تھی۔ پاکستان میں اسکول نہ جانے والے بچوں کی تعداد 26.2 ملین تک پہنچ چکی ہے، اور TCF تعلیم کے بحران کو حل کرنے کے لیے پرعزم ہے تاکہ ہر بچے کو معیاری تعلیم تک رسائی حاصل ہو سکے۔ اس ٹورنامنٹ سے حاصل ہونے والی رقم TCF کو ضرورت مند بچوں کے لیے تعلیم فراہم کرنے میں مدد دے گی۔دو دہائیوں سے زائد عرصے سے، TCF ملک کے کمزور طبقوں کے بچوں کو معیاری تعلیم فراہم کرنے کے لیے محنت کر رہا ہے۔ پاکستان بھر میں 2,033 اسکولوں کے یونٹس پر مشتمل وسیع نیٹ ورک اور 301,000 طلباء کی تعداد کے ساتھ، جس کی قیادت 14,700 خواتین اساتذہ کی ٹیم کر رہی ہے، TCF پسماندہ کمیونٹیز کے بچوں کے لیے ایک روشن مستقبل فراہم کر کے ان کی زندگیوں کو بدل رہا ہے۔ یہ سب افراد، کاروباری اداروں اور کارپوریٹ شراکت داروں کی فراخدلانہ حمایت کے بغیر ممکن نہ ہوتا۔TCF کے شریک بانی اور ڈائریکٹر، مسٹر مشتاق چھاپڑا نے کہا، ”تعلیم ایک بنیادی حق ہے، اور پاکستان کی ترقی کے لیے ہر بچے کو سیکھنے کا موقع ملنا چاہیے۔ ہر سال، ہمارے شاندار گالفرز کی کمیونٹی نہ صرف مقابلہ کرنے کے لیے اکٹھی ہوتی ہے بلکہ وہ ضرورت مند بچوں کے لیے زندگی بدلنے والے اثرات مرتب کرنے کا بھی موقع فراہم کرتی ہے۔ ان کی سخاوت اور حمایت ان بچوں کو دوبارہ کلاس رومز میں واپس لانے اور ان کے خوابوں کو دوبارہ زندہ کرنے میں اہم کردار ادا کرتی ہے۔” ایونٹ کی خاص بات تبارک رحمان کی موجودگی تھی، جو بطور مہمان اسپیکر شریک ہوئے۔ تبارک، جو تعلیم کے پختہ  حامی ہیں، تبارک رحمان نے پاکستان بھر میں 1,600 کلومیٹر دوڑ کر 7,000 بچوں کی مدد کے لیے اپنی متاثر کن کہانی شیئر کی، اور تعلیم کے لیے ایک ملین ڈالرز سے زائد رقم اکٹھا کرنے کا مقصد ظاہر کیا۔ ان کی کہانی اس بات کا طاقتور پیغام تھی کہ لگن اور عزم بچوں کی زندگیوں پر کتنا گہرا اثر ڈال سکتے ہیں۔