پاکستان سمیت دنیا بھر میں یونیورسل ہیلتھ کوریج کا دن منایا گیا

کراچی(پی پی آئی) پاکستان سمیت دنیا بھر میں جمعرات12دسمبر کو یونیورسل ہیلتھ کوریج کا دن منایا  گیا۔یونیورسل ہیلتھ کوریج سے مراد لوگوں کو بلاتخصیص صحت کی معیاری سہولیات کی فراہمی ہے جو کہ احتیاط، علاج، بحالی اور دیکھ بھال پر مشتمل ہے۔اقوام متحدہ کے مستحکم ترقی کے اہداف کے تحت تمام ممالک 2030تک یونیورسل ہیلتھ کوریج یقینی بنانے کے لیے پر عزم  ہیں،پاکستان ہیلتھ فورم نے یونیورسل ہیلتھ کوریج  کے عالمی دن کے موقع پر ایک  پیغام میں کہا ہے کہ شعبہ صحت کی بہتری کے لیے ہسپتالوں کی حالت زار اور طب سے وابستہ افراد کی استعداد اور وسائل بہتر بنانا بھی ضروری ہے۔پاکستان ہیلتھ فورم کے اعلامیہ کے مطابق ساتھ ہی  ساتھ عوام میں متوازن خوراک،اور ورزش، کی اہمیت کے ساتھ ساتھ نشے جیسی نقصان دہ عادتوں سے اجتناب کا شعور اجاگر کرنا بھی ضروری ہے۔تاکہ صحت مند معاشرہ کا قیام ممکن ہو سکے۔