شکارپور(پی پی آئی) شکارپور پولیس نے جمعرات کو تھانہ سلطان کوٹ کی حدود میں پولیس مقابلے میں ایک بین الصوبائی ڈاکو کو ہلاک کرنے کا دعویٰ کیا ہے۔جمعرات کو ایس ایس پی آفس شکارپور سے جاری ہونے والی پریس ریلیز کے مطابق دوست واہ کے قریب سلطان کوٹ پولیس اور ڈاکوؤں کے درمیان پولیس مقابلہ ہوا۔فائرنگ کے تبادلے کے نتیجے میں ضلع کندھ کوٹ کا ایک ڈاکو جس کی شناخت دلشاد سوریانی کے نام سے ہوئی، مقابلے میں مارا گیا۔دوسرے گینگسٹر مارے گئے ڈاکو دلشاد سوریانی کی لاش اپنے ساتھ لے جانے میں کامیاب ہوگئے۔
بعد ازاں ہلاک ہونے والے ڈاکو کی لاش لے جانے والے دیگر فرار ہونے والے گینگسٹرز کی شناخت اصغر مارفانی، نواز عرف اظہر مارفانی، بشیر مارفانی اور شہمور مارفانی کے نام سے ہوئی۔ایس ایس پی شکارپور شاہ زیب چاچڑ نے بتایا کہ پولیس نے علاقے کو گھیرے میں لے کر سرچ آپریشن شروع کردیا ہے اور فرار ہونے والے ڈاکوؤں کو جلد گرفتار کرلیا جائے گا۔ایس ایس پی شکارپور شاہ زیب چاچڑ نے انکشاف کیا کہ ہلاک ڈاکو دلشاد سوریانی اسلحہ اور منشیات کی بین الصوبائی سمگلنگ میں ملوث تھا۔ آخری اطلاعات تک نہ تو ہلاک ہونے والے ڈاکو کی کوئی لاش ملی اور نہ ہی کسی ڈاکو کی گرفتاری کی اطلاع ملی۔