ملک بھر میں شدید سردی، جھیلیں، آبشار جم گئے، حد نگاہ 30 میٹر رہ گئی

اسلام آباد(پی پی آئی) ملک میں سردی اپنے جوبن پر ہے بارش اور برفباری سے شہری ٹھٹھر گئے ہیں، جھیلیں اور آبشار جم گئے ہیں، جبکہ  دھند کے باعث موٹرویز  کو بھی مختلف مقامات سے بند کردیا گیا۔ بلوچستان کے علاقوں قلعہ سیف اللہ، مسلم باغ اور کان مہترزئی میں شدید سردی ہے، جہاں پارہ منفی سات ریکارڈ کیا گیا اور شہری گھروں میں محصور ہوگئے۔ کراچی میں بھی سردی کی شدت میں اضافہ ہوگیا اور درجہ حرارت بارہ ڈگری سینٹی گریڈ ریکارڈ کیا گیا، غذر کی مشہور خلتی جھیل جم گئی، ڈیڑھ سو فٹ گہری جھیل کو بچوں نے فٹبال گراؤنڈ بنا دیا۔ آج بھی ملک کے بیشتر علاقوں میں موسم سرد اور خشک رہے گا، جبکہ پہاڑی علاقوں میں شدید سردی ہوگی، صبح اور رات کے اوقات میں پنجاب، خیبر پختونخوا اور بالائی سندھ کے میدانی علاقوں میں شدید دْھند چھائے رہنے کا امکان ہے۔ پشاور میں دھند کے باعث موٹر وے ایم ون پشاور سے غازی بروتھا انٹر چینج تک بند ہے، موٹر وے پولیس کے مطابق موٹر وے پر حد نگاہ 30 میٹر رہ گئی ہے۔ یہ بھی پڑھیں: کراچی کاموسم کیسارہے گا؟ محکمہ موسمیات کی بڑی پیشگوئی  لاہور میں شدید دھند کے باعث موٹر وے ایم ٹو اور ایم تھری ٹریفک کیلئے مکمل بند کر دی گئیں، اس حوالے سے ترجمان موٹر وے پولیس کا کہنا ہے کہ موٹر وے ایم ٹو لاہور سے ہرن مینار تک دھند کے باعث بند کر دی گئی ہے جبکہ موٹر وے ایم 3 کو بھی لاہور سے جڑانوالہ تک دھند کی وجہ سے بند کیا گیا ہے۔ ترجمان کے مطابق موٹر ویز کو عوام کی حفاظت اور محفوظ سفر یقینی بنانے کیلئے بند کیا جاتا ہے۔ موٹر وے پولیس کے ترجمان کا کہنا ہے کہ شہری زیادہ سے زیادہ دن کے اوقات میں سفر کریں، غیر ضروری سفر سے گریز کیا جائے، تیز رفتاری سے پرہیز کریں اور اگلی گاڑی سے مناسب فاصلہ رکھیں تاکہ کسی بھی غیر متوقع صورتحال سے بچا جا سکے۔