گورنر سندھ کامران ٹیسوری سے فاروق ستار، انیس قائم خانی کی ملاقات

کراچی(پی پی آئی) گورنر سندھ کامران خان ٹیسوری سے متحدہ قومی موومنٹ پاکستان کے سینئر وائس چیئرمین ڈاکٹر فاروق ستار اور سینئر ڈپٹی کنوینئر انیس قائم خانی کے ہمراہ وفد نے گورنر ہاوس میں ملاقات کی، جاری صورتحال، گورنر اینیشیٹو اور دلچسپی کے دیگر امور پر تبادلہ خیال کیا گیا۔ گورنر سندھ نے کہا کہ گورنر ہاوس میں تمام قومیت کے ثقافتی ایام کو بھرپور انداز میں منایا جاتا ہے، 24دسمبر کے روز گورنر ہاوس میں مہاجر کلچر ڈے منایا جائے گا، گورنر سندھ نے مزید کہا کہ پاکستان کی معیشت مستحکم ہوچکی،ہر شعبہ میں مثبت اشاریئے ظاہر ہو رہے ہیں، کراچی کی صنعتی فعالیت، تجارتی و معاشی سرگرمی کے لئے بھرپور اقدامات یقینی بنائے جارہے ہیں۔ گورنر ہاوس میں مہاجر ڈے منانے پر رہنماوں نے گورنر سندھ سے اظہار تشکر کیا۔ بعد ازاں ڈاکٹر فاروق ستار اور انیس قائم خانی نے آئی ٹی مارکی کا دورہ بھی کیا۔ ڈاکٹر فاروق ستار نے طلباکو فراہم سہولیات کی تعریف کی اورکہا کہ گورنر اینیشیٹیو شاندار اقدام ہے۔ انیس قائم خانی نے کہا کہ عصر حاضرکے آئی ٹی کورسز سے نوجوانوں کا مستقبل تابناک ہوگا۔