عادی جرائم پیشہ افراد کیخلاف رینجرز اور پولیس کے مشترکہ آپریشن تیز کرنے کا فیصلہ

 کراچی(پی پی آئی) ہیڈ کوارٹرز پاکستان رینجرز(سندھ) میں ڈی جی رینجرز (سندھ) میجر جنرل محمد شمریزاور آئی جی سندھ کی زیر صدارت سیکیورٹی کے حوالے سے اجلاس منعقد ہواجس میں کمشنر کراچی، ایڈیشنل آئی جیز (کراچی اور اسپیشل برانچ)،ایڈیشنل سیکرٹری ہوم ڈیپارٹمنٹ، جوائنٹ ڈی جی آئی بی، ڈی آئی جیز (سی ٹی ڈی کراچی، ویسٹ، ٹریفک، ایسٹ،  ایس پی یو، سی آئی اے اینڈ ساؤتھ)پولیس، رینجرزاور حساس اداروں کے اعلیٰ افسران نے شرکت کی۔اجلاس کے دوران گزشتہ  اجلاس میں سیکیورٹی کے لیے منظور شدہ لائحہ عمل پر پیشرفت یومِ قائد، کرسمس اور نئے سال کی تقریبات کی مناسبت سے سیکیورٹی کا جائزہ لیا گیا۔ اجلاس میں کراچی میں موجودہ امن و امان کی صورتحال اورلا انفورسمنٹ ایجنسیز کی جانب سے عادی جرائم پیشہ افراد کے خلاف رینجرز اور پولیس کے مشترکہ آپریشن تیز کرنے، شہر کے داخلی و خارجی راستوں اور بین الصوبائی چیک پوسٹوں پر چیکنگ کے عمل کو مزید سخت بنانے کی ہدایات جاری کی گئیں۔اجلاس میں حکومت کے جاری کردہ احکامات کی روشنی میں سال نو کے موقع پر اسلحہ کی نمائش،ہوائی فائرنگ پرپابندی کو یقینی بنانے اور قانون کی خلاف ورزی کرنے والے افراد کے خلاف سخت کاروائی کرنے کا فیصلہ کیا گیا۔ اجلاس کے دوران یومِ قائد، کرسمس اور نئے سال کی تقریبات کے دوران سیکیورٹی کو فول پروف بنانے اور کسی بھی قسم کے سیکیورٹی خدشات سے نمٹنے کے لیے رینجرز، پولیس اور دیگرلاء انفورسمنٹ ایجنسیز کی جانب سے مشترکہ لائحہ عمل منظور کیا گیا۔