بھارتی افواج نے ظلم و جبر کے ہتھکنڈے آزمائے، لیکن کشمیریوں کو شکست نہیں دے سکے:صدر آزاد جموں و کشمیر

مظفرآباد 4 جنوری(پی پی آئی) آزاد جموں و کشمیر کے  صدر، بیرسٹر سلطان محمود چوہدری نے کہا کہ کشمیری عوام گزشتہ سات دہائیوں سے اپنے حقِ خودارادیت کے حصول اور آزادی کی تحریک کے لیے بے مثال قربانیاں دے رہے ہیں۔ کشمیری ریاست جموں و کشمیر کو ناقابل تقسیم وحدت سمجھتے ہیں،اقوام متحدہ اور مہذب دنیا کشمیری عوام کی خواہشات کے مطابق مسئلہ کشمیر کے حل میں اپنا کردار ادا کرے۔صدارتی سیکرٹریٹ،ایوان صدر،کشمیر ہاؤس،اسلام آبادکے اعلامیہ کے مطابق اپنے خصوصی پیغام میں صدر آزاد ریاست جموں و کشمیر بیرسٹر سلطان محمود چوہدری نے کہا کہ کشمیری عوام بھارت کے غاصبانہ تسلط کے خاتمے اور اپنے بنیادی حق کے حصول کے لیے اپنی جانوں کا نذرانہ پیش کر رہے ہیں اور تحریک آزادی کشمیر کے لیے اپنی جانیں قربان کر رہے ہیں۔ مقبوضہ کشمیر کے عوام نے ثابت کر دیا ہے کہ وہ مر مٹ سکتے ہیں، لیکن اپنے موقف سے پیچھے نہیں ہٹ سکتے،گزشتہ سات دہائیوں میں درندہ صفت بھارتی افواج نے ظلم و جبر کے ہر ہتھکنڈے آزمائے، لیکن کشمیریوں کی جرات، پامردگی، اور حوصلے کو شکست نہیں دے سکے۔