سندھ بیچ گیمز17 سے 19 جنوری تک ساحل کلفٹن کراچی پر منعقد ہوں گے

کراچی 10جنوری(پی پی آئی) محکمہ کھیل حکومت سندھ17 سے 19 جنوری تک نشان پاکستان کراچی کے قریب کلفٹن کے ساحل پر سندھ بیچ گیمز کا انعقاد کر رہا ہے،جن کھیلوں کو شامل کیا گیا ہے ان میں بیچ والی بال،بیچ ٹینس،بیچ ساکر،بیچ کبڈی،بیچ ہینڈ بال،بیچ تھروبال اور بیچ باکسنگ شامل ہیں۔جس میں سندھ بھر کے تمام ڈویژن سے بوائز اور گرلز کھلاڑی شرکت کریں گے۔اس سلسلے میں محکمہ کی جانب سے تمام ڈویژن کی اسپورٹس ایسوسی ایشنز سے کہا گیا ہے کہ اپنے اپنے ڈسٹرکٹس میں ٹرائلز کا انعقاد کریں اور تین بوائز اور تین گرلز کھلاڑیوں کا ان بیچ گیمز کے لئے انتخاب کریں۔ٹرائلز کا انعقاد 13 جنوری تک محکمہ کھیل کے متعلقہ ڈسٹرکٹ اسپورٹس آفیسرکے تحت ہونا چاہئے۔محکمہ کھیل کی جانب سے منتخب کھلاڑیوں کو تمام سہولیات فراہم کی جائیں گی جبکہ محکمہ کھیل کے تحت کھلاڑیوں اور آفیشلز کی تکنیکی صلاحیتوں کو بڑھانے کے لیے ہر کھیل کے لیے الگ ورکشاپ منعقد کرانے پر بھی غور کیا جا رہا ہے۔ورکشاپ میں ٹیم آفیشلز اور کھلاڑی  ساتھ شرکت کریں گے۔