حیدرآباد14جنوری (پی پی آئی)سندھ زرعی یونیورسٹی ٹنڈوجام کے انفارمیشن ٹیکنالوجی سینٹر کی میزبانی میں سابق وائس چانسلر ڈاکٹر فتح مری کی چار سالہ خدمات اور کارکردگی کو سراہنے کے لیے ایک پروقار تقریب منعقد ہوئی۔ اس موقع پر خطاب کرتے ہوئے ڈاکٹر فتح مری نے کہا کہ پاکستان دنیا کے تیزی سے بڑھتی ہوئی آبادی والے ممالک میں شامل ہے، اور مستقبل میں ورچوئل ٹریڈ میں پاکستان کا عالمی معیشت میں اہم حصہ ہوگا۔ انہوں نے مزید کہا کہ پاکستان کی آئی ٹی اور آئی ٹی سے منسلک خدمات کی برآمدات مالی سال 2023-24 میں 3.2 بلین ڈالر تک پہنچ چکی ہیں، جو آئی ٹی کے شعبے کی معاشی ترقی میں اہمیت کو ظاہر کرتی ہیں۔ڈاکٹر فتح مری نے اس بات پر بھی روشنی ڈالی کہ سندھ زرعی یونیورسٹی کے طلبہ نے ملکی اور علاقائی سطح پر نمایاں کامیابیاں حاصل کی ہیں، جو یونیورسٹی کی شاندار کارکردگی اور آئی ٹی تعلیم میں اعلیٰ معیار کی عکاسی کرتی ہیں۔ انہوں نے کہا کہ اپنے دورِ قیادت میں یونیورسٹی کو مالی بحران سے نکالنے اور تدریسی معیار کو بلند کرنے کی بھرپور کوشش کی، جس کے نتیجے میں ادارے کی ساکھ بہتر ہوئی۔سندھ زرعی یونیورسٹی کے قائم مقام وائس چانسلر ڈاکٹر الطاف علی سیال نے کہا کہ ان کی کوشش ہوگی کہ یونیورسٹی میں تدریس اور تحقیق کے معیار کو مزید بہتر بنایا جائے اور میرٹ کو فوقیت دی جائے۔ انہوں نے ڈاکٹر فتح مری کی خدمات کو سراہا۔عمرکوٹ سب کیمپس کے پرو وائس چانسلر ڈاکٹر جان محمد مری نے ڈاکٹر فتح مری کی خدمات کو قابل ستائش قرار دیا۔ اس موقع پر آئی ٹی سینٹر کے ڈائریکٹر ڈاکٹر میر سجاد ٹالپر، ڈاکٹر مبینہ پٹھان، ڈاکٹر محمد یعقوب کوندھر اور دیگر مقررین نے بھی خطاب کیا۔ اس موقع پر یونیورسٹی کے مختلف کلیات کے ڈینز، تدریسی و انتظامی شعبوں کے سربراہان، اساتذہ، اور طلبہ کی بڑی تعداد شریک تھی۔
Next Post
شہدادکوٹ میں مسلح ملزمان کی فائرنگ سے آٹو شاپ کا مالک زخمی،ملزمان فرار
Tue Jan 14 , 2025
شہدادکوٹ 14جنوری (پی پی آئی)شہدادکوٹ میں خضدار چوک پر نامعلوم مسلح ملزمان نے آٹوشاپ کے مالک جہانگیر کمبوہ پر فائرنگ کرکے اسے زخمی کردیا اور فرار ہوگئے، فائرنگ سے زخمی جہانگیر کمبوہ کولاڑکانہ اسپتال منتقل کیا گیا۔ واقعہ کے خلاف متاثرہ شخص کے ورثا سمیت دیگر دکانداروں نیخضدار چوک پر احتجاج کیا اور دھرنا دے کر ٹائر نذر آتش کئے […]