پولیس ٹریننگ سینٹر سریاب روڈ کوئٹہ میں 101 بیج کی پاسنگ آؤٹ پریڈ منعقد

کوئٹہ، 22جنوری (پی پی آئی) انسپکٹر جنرل آف پولیس بلوچستان معظم جاہ انصاری نے بدھ کے روز کہا ہے کہ بلوچستان پولیس فورس کے متعدد پولیس افسران اور اہلکاروں نے فرائض کی ادائیگی کے دوران اپنی جانوں کا نذرانہ پیش کیا۔ان خیالات کا اظہار انہوں نے پولیس ٹریننگ سینٹر سریاب روڈ کوئٹہ میں پولیس کے 101 بیج کی پاسنگ آؤٹ پریڈ سے خطاب کرتے ہوئے کیا۔ انہوں نے کہا کہ بلوچستان کی موجودہ صورتحال کے پیش نظر پولیس کا کردار ماضی کی نسبت بڑھ گیا ہے، بلوچستان میں پولیس افسران اور اہلکاروں کی زندگیوں کو خطرات لاحق ہیں۔ بلوچستان میں دہشت گردی اور جرائم کی بیخ کنی کے لیے پولیس فورس کے کردار پر روشنی ڈالتے ہوئے انہوں نے کہا کہ ہمیں دہشت گردی اور دیگر جرائم کے خلاف کردار ادا کرنا ہو گا۔ انہوں نے کہا کہ بلوچستان پولیس فورس میں خواتین کی شمولیت بلوچستان پولیس فورس پر اعتماد اور بھروسا ہے جس سے بلوچستان پولیس فورس میں خواتین کی تعداد 1000 تک پہنچ گئی ہے۔ پولیس کو اپنے فرائض ایمانداری اور تندہی سے ادا کرنے کی ضرورت ہے، انہوں نے مزید کہا کہ “آپ کا اعلیٰ اخلاق محکمہ پولیس کا نام روشن کرتا ہے”۔