نوشکی میں گاڑی ڈرائیور اور 10 سالہ چرواہا قتل،نامعلوم ملزمان فرار

نوشکی، 30 جنوری (پی پی آئی)صوبہ بلوچستان کے ضلع نوشکی میں جمعرات کو دو مختلف واقعات میں دو افراد کوجن میں ایک گاڑی کا ڈرائیور اور 10 سالہ چرواہا بھی شامل ہے، قتل کردیا گیا۔پولیس کے مطابق، نامعلوم مسلح افراد نے نوشکی کے علاقے کلی منگال کے قریب ایک گاڑی پر فائرنگ کی، جس کے نتیجے میں گاڑی کا ڈرائیور مارا گیا۔ مقتول کی شناخت طارق مینگل ولد نیک نذر مینگل، رہائشی کلی قادرآباد نوشکی کے طور پر کی گئی۔ لاش کو میرا گل خان نصیر ٹیچنگ اسپتال نوشکی منتقل کیا گیا، جہاں ضروری میڈیکو لیگل کارروائیاں مکمل کرنے کے بعد لاش ورثاکے حوالے کر دی گئی۔ اس واقعے نے مقتول کے گھر میں غم کی لہر دوڑادی۔ مزید تحقیقات نوشکی پولیس اسٹیشن کے حکام کی جانب سے کی جا رہی ہیں۔علیحدہ واقعے میں، نوشکی کے پہاڑی علاقے کلی سنگی نوشکی کے ایک 10 سالہ بچے محمد عابد کی لاش بھی برآمد ہوئی، جسے پتھروں سے مار کر قتل کیا گیا تھا۔ رپورٹ کے مطابق، محمد عابد ولد محمد حسن، جو کہ گزشتہ روز اپنے مویشیوں کو پہاڑوں میں چرانے گیا تھا، اس کی لاش کلی سنگی کے پہاڑی علاقے میں پڑی ہوئی ملی۔ لاش کو اس کے گھر کلی محمد حسن سنگبر کلی سنگی منتقل کیا گیا اور اس کی تدفین آبائی قبرستان میں کی گئی۔