رمضان المبارک میں اشیائے خوردونوش کی مناسب فراہمی کے لئے خصوصی قیمتیں مقرر

اسلام آباد،یکم مارچ (پی پی آئی)کراچی انتظامیہ نے ماہ رمضان المبارک میں اشیا خوردونوش کی مناسب فراہمی کے لئے خصوصی قیمتیں مقرر کر دی ہیں۔ کمشنر کراچی سید حسن نقوی نے گروسری، بیف اور مٹن کی قیمتوں کی فہرستیں جاری کرتے ہوئے اعلان کیا کہ ان نرخوں کو سختی سے نافذ کیا جائے گا۔”کمشنر نے واضح کیا کہ دکانداروں کو قیمتوں کی فہرستیں نمایاں طور پر آویزاں کرنے کی ہدایت دی گئی ہے، اور سرکاری نرخوں کی خلاف ورزی کرنے والوں کے خلاف سخت کارروائی کی جائے گی۔”تمام ڈپٹی کمشنرز کو ہدایت دی گئی ہے کہ وہ ناجائز منافع خوروں کے خلاف سختی سے نمٹیں اور شہریوں کو ماہ رمضان میں اشیاکی مناسب قیمت پر دستیابی یقینی بنائیں۔”بیورو آف سپلائی کو بچت بازاروں میں اشیا کی رعایتی قیمت پر دستیابی کے اقدامات کرنے کی ہدایت کی گئی ہے، جبکہ سبزی اور فروٹس کی قیمتیں روزانہ کی بنیاد پر مقرر کی جائیں گی۔”کمشنر نے شہریوں کو گراں فروشی کی شکایات کے لئے کمشنر کراچی کنٹرول روم کے فعال ہونے کی اطلاع دی ہے، جہاں شکایات فون نمبر 02199205634 اور 02199203443 پر درج کروائی جا سکتی ہیں۔”انتظامیہ کی کوششوں کو مزید موثر بنانے کے لئے شہریوں کا تعاون ضروری قرار دیا گیا ہے۔”