وزیراعظم کا زرعی شعبے کی ترقی کے لیے تمام ضروری سہولتیں فراہم کرنے کا عزم

اسلام آباد (پی پی آئی) وزیراعظم محمد شہباز شریف نے زرعی شعبے کی ترقی اور زرعی پیداوار میں اضافے کے لیے تمام ضروری سہولتیں فراہم کرنے کے عزم کا اظہار کیا ہے۔قومی تحفظ خوراک اور تحقیق کی وزارت سے متعلق امور کے جائزہ اجلاس کی صدارت کرتے ہوئے انہوں نے زراعت کو قومی معیشت میں ریڑھ کی ہڈی قرار دیا۔انہوں نے زرعی شعبے کی بہتری کے لیے ملک بھر سے نوجوان زرعی محققین کو شامل کرنے پر زور دیا اور غیر معیاری زرعی بیج فروخت کرنے والی کمپنیوں کے خلاف سخت کارروائی کی ہدایت دی۔وزیراعظم نے پاکستان میں خوردنی تیل کی پیداوار بڑھانے کے اقدامات تیز کرنے کی ضرورت پر بھی زور دیا تاکہ درآمدات پر خرچ ہونے والا قیمتی زرمبادلہ بچایا جا سکے۔انہوں نے پاکستان زرعی تحقیقاتی کونسل میں تحقیقی سرگرمیاں جلد بحال کرنے کی ہدایت کی اور کہا کہ صوبائی حکومتوں، نجی شعبے اور دیگر شراکت داروں کے تعاون سے زرعی مشینری کے فروغ کو یقینی بنایا جائے۔مزید برآں، وزیراعظم نے پھلوں اور سبزیوں کی پیداوار میں اضافے اور زرعی مصنوعات کی تیاری کے لیے نوجوانوں کی تربیت اور آسان زرعی قرضوں کی فراہمی پر بھی زور دیا۔انہوں نے پاسکو کی تحلیل کے لیے تمام ضروری امور فوری طور پر حل کرنے کے احکامات جاری کیے۔