آزاد کشمیرکھوڑی چنہ میں جموں کشمیر جوائنٹ عوامی ایکشن کمیٹی کا پاور شو، بجلی بحران پر کڑی تنقید

مظفرآباد،23اپریل (پی پی آئی)کھوڑی چنہ میں جموں کشمیر جوائنٹ عوامی ایکشن کمیٹی کے تحت منعقدہ پاور شو میں بجلی کی وولٹیج کی کمی اور برقیات کے نظام پر سخت تنقید کی گئی۔ ایکشن کمیٹی نے مطالبہ کیا کہ دس مئی تک ان کے چارٹرڈ آف ڈیمانڈ پر عمل درآمد نہ کیا گیا تو  تحریک چلائی جائے گی۔ بجلی چوری کو شہدائے عوامی حقوق سے غداری قرار دیتے ہوئے عوام سے اپیل کی گئی کہ وہ صرف جائز ضرورت کے تحت بجلی استعمال کریں۔علی سوجل میں منعقدہ اس جلسے میں ایکشن کمیٹی کے رکن عمر نذیر کشمیری، لیاقت حیات، خواجہ مہران اور دیگر نے خطاب کیا۔ انہوں نے کہا کہ بجلی کے ناجائز استعمال سے برقی آلات متاثر ہو رہے ہیں اور اس کی خریداری میں کرپشن کی جاتی ہے۔ مقررین نے آزاد کشمیر حکومت کو وارننگ دی کہ مراعات یافتہ طبقہ کے فوائد فوراً ختم کیے جائیں۔جلسے کے دوران گلگت بلتستان میں جاری عوامی تحریک کی مکمل حمایت کا اعلان بھی کیا گیا اور اسیران کی فوری رہائی کا مطالبہ کیا گیا۔ مقررین نے کہا کہ آزاد کشمیر کی کرپشن کی مثال کہیں نہیں ملتی اور عوامی حقوق کی بحالی کے لیے جدوجہد جاری رکھی جائے گی۔ایکشن کمیٹی نے عوام سے حلف لیا کہ وہ بجلی چوری نہیں کریں گے اور بجلی کے صحیح استعمال کو یقینی بنائیں گے۔ شرکا نے چار شہیدوں کو خراج تحسین پیش کیا اور ان کی قربانیوں کو یاد رکھنے کے لیے ہر سال تیرہ مئی کو قومی دن کے طور پر منانے کا اعلان کیا۔ اگر ان کے مطالبات پورے نہ ہوئے تو سخت احتجاج کی کال دی جائے گی۔”