نصیرآباد ٹیلیفون ایکسچینج کے چوکیدار کے ریپیٹر سے اچانک گولی چلنے سے ایک طالبہ جاں بحق،2زخمی

نصیرآباد،7 مئی (پی پی آئی)  نصیرآباد میں امتحانی پرچہ دے کر گھر واپس آنے والی بارہویں جماعت کی طالبات کے ساتھ حادثہ پیش آیا، جس کے نتیجے میں ایک طالبہ جاں بحق جبکہ دو زخمی ہو گئیں۔ تفصیلات کے مطابق نصیرآباد ٹیلیفون ایکسچینج کے قریب چوکیدار صفدر علی بروہی کے ریپیٹر سے اچانک گولی چلنے سے 18 سالہ زہرہ بنت غلام شبیر موقع پر ہی دم توڑ گئی۔حادثے میں 16 سالہ سلمیٰ بنت ممتاز وکو اور 18 سالہ پرہ بنت وزیر علی بھٹی زخمی ہو گئیں، جنہیں فوری طور پر رورل ہیلتھ سینٹر منتقل کیا گیا۔ زخمی طالبات کی حالت تشویشناک ہونے پر انہیں لاڑکانہ اسپتال منتقل کیا گیا۔ جاں بحق طالبہ کی لاش پوسٹ مارٹم کے بعد ورثا کے حوالے کر دی گئی جس پر گھر میں کہرام مچ گیا۔ایس ایچ او نصیرآباد نے میڈیا کو بتایا کہ طالبات امتحانی مرکز سے گھر واپس جا رہی تھیں کہ صفدر بروہی کے ریپیٹر سے اچانک فائر ہوگیا۔ ملزم کو گرفتار کر لیا گیا ہے اور مزید تفتیش جاری ہے۔