پولیوسمپلنگ کی رپورٹ مثبت آنے کے باعث مظفرآبادآزاد کشمیر میں انسداد ی مہم کی تیاریاں

مظفرآباد 15مئی (پی پی آئی) ڈپٹی کمشنر مظفرآباد مدثر فاروق کی زیر صدارت اجلاس میں 26 مئی تا 30 مئی 2025 کو پولیو مہم کے دوبارہ آغاز کی تیاریوں کا جائزہ لیا گیا۔ اجلاس میں ڈی ایچ او مظفرآباد ڈاکٹر عبدالمتین اور دیگر عہدیداران نے شرکت کی۔ ڈاکٹر عبدالمتین نے بتایا کہ ماحولیاتی سیمپلنگ کی رپورٹ مثبت آنے کے باعث یہ مہم دوبارہ شروع کی جا رہی ہے۔مہم کے دوران محکمہ صحت عامہ کی ٹیمیں پانچ سال سے کم عمر کے بچوں کو پولیو کے قطرے پلائیں گی۔ 1237344 بچوں کو ویکسین دینے کے لئے 764 موبائل ٹیمیں، 67 فکس سائیٹس اور 19 ٹرانزٹ پوائنٹس قائم کئے جائیں گے۔مہم کی موثر نگرانی کے لئے 52 یو سی ایم او اور 156 ایریا انچارج مقرر کئے گئے ہیں۔ ٹیموں کو ویکسین اور دیگر ضروری سامان بروقت فراہم کیا جائے گا اور روزانہ کی بنیاد پر پیش رفت رپورٹ ضلعی انتظامیہ کو پیش کی جائے گی۔شکایات یا ٹیموں کی عدم دستیابی کی صورت میں ٹیلی فون نمبر 05822-921959 یا 05822-920224 پر اطلاع دی جا سکتی ہے۔ ضلعی سطح پر ڈسٹرکٹ مانیٹرنگ سیل بھی قائم کیا جا رہا ہے تاکہ مہم کو کامیاب بنایا جا سکے۔