صدر مملکت کا شہید اسکواڈرن لیڈر عثمان یوسف کے خاندان سے اظہار تعزیت

راولپنڈی، 16مئی (پی پی آئی) صدر مملکت آصف علی زرداری نے بھارت کے خلاف معرکہ حق میں شہید ہونے والے اسکواڈرن لیڈر عثمان یوسف کے اہل خانہ سے تعزیت کی۔ صدر نے شہید کے والد اور دیگر خاندان کے افراد سے ملاقات کی اور ان کے ساتھ اظہار ہمدردی کی۔صدر مملکت نے اسکواڈرن لیڈر عثمان یوسف کی وطن کے لیے خدمات اور دفاع وطن میں جان نذر کرنے پر قوم کی جانب سے خراج عقیدت پیش کیا۔ انہوں نے کہا کہ ہمیں اپنے بہادر جوانوں کی قربانیوں پر فخر ہے اور پوری قوم اپنے سپاہیوں کی قربانیوں کو سلام پیش کرتی ہے۔صدر آصف علی زرداری نے کہا کہ ہم اپنے شہداء اور ان کے خاندانوں کی قربانیوں کے ہمیشہ معترف رہیں گے۔ انہوں نے اسکواڈرن لیڈر عثمان یوسف کے لئے فاتحہ خوانی کی اور ان کی بلندی درجات کی دعا کی۔صدر مملکت نے شہید کے لواحقین کے ساتھ اظہار ہمدردی کرتے ہوئے صبر جمیل کی دعا بھی کی۔ ان کا کہنا تھا کہ قوم اپنے شہداء کی قربانیوں کو ہمیشہ یاد رکھے گی۔