بلوچستان کی ترقیاتی ترجیحات پر غور کے لیے اہم اجلاس

کوئٹہ، 19 مئی (پی پی آئی) وزیر اعلیٰ بلوچستان میر سرفراز بگٹی کی صدارت میں فیڈرل پبلک سیکٹر ڈویلپمنٹ پروگرام  پر غور کے لیے ایک اہم اجلاس وزیر اعلیٰ سیکرٹریٹ میں منعقد ہوا۔ اجلاس میں صوبائی وزیر خزانہ میر شعیب نوشیروانی، صوبائی وزیر منصوبہ بندی و ترقیات میر ظہور احمد بلیدی، اور دیگر اعلیٰ حکام نے شرکت کی۔اجلاس میں آئندہ مالی سال کے وفاقی ترقیاتی پروگرام میں بلوچستان کی ترقیاتی ضروریات کا جائزہ لیا گیا۔ وزیر اعلیٰ بگٹی نے کہا کہ پی ایس ڈی پی میں عوامی مفاد کے حامل منصوبوں کو اولیت دی جائے گی۔ انہوں نے مواصلات، توانائی، تعلیم، صحت، آبپاشی، اور پینے کے صاف پانی کے منصوبوں کو اہم قرار دیا۔وزیر اعلیٰ نے وفاقی حکومت سے ترقیاتی فنڈز کی فراہمی میں بلوچستان کو خاص ترجیح دینے کی درخواست کی۔ انہوں نے مواصلات کے جاری اور نئے منصوبوں کے لیے مناسب فنڈز کی ضرورت پر زور دیا۔وزیر اعلیٰ نے متعلقہ محکموں کو ہدایت کی کہ منصوبے فنڈز کے لحاظ سے موزوں ہوں اور ان کی سماجی و مالی اطلاقیت بھی واضح ہو۔ انہوں نے کہا کہ ترقی کے لیے وفاقی وسائل سے بھرپور استفادہ کرنا ہوگا۔اجلاس میں صوبائی حکومت کے اقدامات پر بھی تبادلہ خیال کیا گیا اور وفاقی ترقیاتی پروگرام کے ذریعے بلوچستان کی ترقی میں معاونت کی امید ظاہر کی گئی۔ وزیر اعلیٰ نے کہا کہ بہتر تیاری کے ذریعے آئندہ مالی سال میں بلوچستان کے لیے زیادہ سے زیادہ وسائل حاصل کیے جا سکیں گے۔